समय म मिले आर्थिक सहायता से खरीफ के तैयारी मन ल मिलिस गति, खेती के लागत के बोझा होइस कम
जांजगीर-चांपा, प्रधानमंत्री किसान सम्मान निधि योजना हा किसान मन ला आर्थिक रूप से मजबूत बनावत खेती-किसानी ला नवा ताकत देवत हे। योजना के तहत मिलइया सीधा आर्थिक मदद से किसान मन ला खेती के सामान मन के समय म ब्यवस्था करे के सुबिधा मिलत हे, जेकर से खेती के लागत के बोझा कम होवत हे अउ ओमन पूरा उत्साह के संग खेती के बूता म जुटत हें।
जांजगीर-चांपा जिला के बलौदा विकासखंड के अंतर्गत अवइया नवापारा गांव के रहइया किसान श्री रामनाथ कश्यप घलो ए योजना से लाभ पवइया किसान मन म सामिल हे। प्रधानमंत्री किसान सम्मान निधि योजना के 23वां किस्त मिले के बाद ओमन खरीफ सीजन के तैयारी ला तेज कर दे हे।
श्री कश्यप हा बताइस के ओ ह 7 एकड़ खेत म खेती करथे। हर फसल के सुरु म बीजा, खाद, दवाई अउ दूसर खेती के सामान मन के ब्यवस्था बर भरपूर पइसा के जरूरत परथे। अइसन समय म प्रधानमंत्री किसान सम्मान निधि योजना के तहत मिलइया आर्थिक मदद हा खेती के तैयारी ला सरल बना देथे अउ आर्थिक दबाव ला बड़ कम कर देथे। ओ ह बताइस के 23वां किस्त से मिले पइसा के उपयोग ओ ह बीजा, खाद अउ दूसर खेती के काम मन म करिही, जेकर से समय म बोआई के संग सुग्घर फसल होय के आसा हावे।
श्री रामनाथ कश्यप हा प्रधानमंत्री श्री नरेंद्र मोदी अउ मुख्यमंत्री श्री विष्णु देव साय के आभार जतावत कहिस के प्रधानमंत्री किसान सम्मान निधि योजना किसान मन बर बड़ उपयोगी साबित होवत हे। ए योजना खेती बर समय म आर्थिक सहयोग देहे के संगे-संग गॉव के अरथब्यवस्था ला घलो मजबूत करत हे, जेकर से किसान मन के जिनगी अउ जादा सुखी अउ आत्मनिर्भर बनत हे।
