- मुख्यमंत्री के चिंता: रसायनिक तत्व मन ले जमीन के उर्वरा शक्ति होवत हे कम
- चंद्रनाहू समाज के वार्षिक अधिवेशन म मुख्यमंत्री होईन सामिल
रायपुर, ‘‘प्रदेश के संसाधन मन अऊ सरकार उपर पहिली हक इहां के किसान मन के हे, ए खातिर उंखर समस्या मन के हल पहिली प्राथमिकता ले होही। छत्तीसगढ़ देश के अइसन पहिली राज्य हे, जिहां सरकार ह किसान मन के मेहनत के मरम समझत 2500 रूपिया प्रति क्विंटल के मान ले समर्थन मूल्य म धान बिसाये के निर्णय लेहे हे।‘‘
मुख्यमंत्री श्री भूपेश बघेल ह अइसन विचार आज चंद्रनाहू समाज के दू दिन के वार्षिक अधिवेशन म व्यक्त करिन। कुरूद के चंद्राकर के समाज मंगल भवन म आयोजित चंद्रनाहू कुर्मी क्षत्रिय समाज के 50वां केन्द्रीय महाअधिवेशन म उमन कहिन कि राज्य शासन किसान मन अऊ जमीन ले जुड़े मनखे मन के हित मन के रक्षा करे के हर सम्भव प्रयास करही, एखर बर संसाधन मन के कमी नइ होवय। श्री बघेल ह खेती के अभी हाल के पद्धति उपर चिंता जाहिर करत कहिन कि रसायनिक तत्व मन ले जमीन के उर्वरा शक्ति सरलग कम होत जात हे, जेखर मानव जीवन म घलोक प्रतिकूल प्रभाव परत हे। अइसनहे जल संसाधन मन के बहुत दोहन ले भूजल स्तर म सरलग गिरावट आवत हे, जऊन गम्भीर चिंता अउ चिंतन के विसय हे।
मुख्यमंत्री ह कहिन कि इही समस्या मन ल धियन करत राज्य शासन ह नरवा, गरवा, घुरवा अऊ बाड़ी योजना संचालित करे हे। ए ड्रीम प्रोजेक्ट के मुख्य उद्देश्य जैविक खेती ल पुनर्जीवित करना, जल संरक्षण के उपाय करना, गौवंश के संवर्धन करना अऊ गोबर के माध्यम ले कम्पोस्ट तैयार करके पोषक सब्जी, फल जइसे फसल मन ल बढ़ावा देना हे। उमन वाटर रिचार्ज म जोर दीन, जेखर से कि जलसोत मन म जादा ले जादा समय पानी ल बनाये रखे जाय अउ जल संकट जइसे भयावह स्थिति निर्मित झन होवय।
मुख्यमंत्री ह कहिन कि चंद्रनाहू समाज के मनखे जमीन ले जुड़े, कर्तव्यनिष्ठ, परिश्रमी अऊ स्वाभिमानी हें। उमन समाज के मनखे मन ले शासन के योजना मन ल सफल बनाए बर सहयोग करे के अपील करिन। संगेच समाज के मांग मन ल पूरा करे के आश्वासन दीन।
धमतरी जिला के विकासखण्ड मुख्यालय कुरूद म आयोजित ए कार्यक्रम ल सिहावा विधानसभा क्षेत्र के विधायक डॉ. लक्ष्मी ध्रुव, महासमुंद विधायक श्री विनोद चंद्राकर अउ पण्डरिया विधानसभा क्षेत्र के विधायक श्रीमती ममता चंद्राकर ह घलोक संबोधित करिन। एकर पहिली मुख्यमंत्री के स्वागत छत्तीसगढ़ के पारम्परिक चिनहा नांगर (हल), कमरा अऊ खुमरी भेंट करके करे गीस। मुख्यमंत्री ह कई ठन क्षेत्र मन म उत्कृष्ट अउ उल्लेखनीय उपलब्धि पवइया समाज के युवक-युवती मन ल अउ छात्र-छात्रा मन ल प्रशस्ति-पत्र अउ स्मृति चिन्ह भेंट करके सम्मानित करिन।
