किशोरी अमृत सरोवर बनिस खुशहाली के स्रोत

जुन्ना तालाब के कायाकल्प,  सिंचाई अऊ मछलीपालन ले बदलत हे गांव वाले मन के जिंदगी
कोरिया, जिला के सोनहत जनपद पंचायत क्षेत्र के ग्राम किशोरी म मिशन अमृत सरोवर के तहत नवीनीकृत होय तालाब आज ग्रामीण जीवन ल नवा दिशा देहे हे। कभू अनुपयोगी हो चुके ये तालाब अब गांव वाले मन बर दैनिक निस्तार, पशु मनके पेयजल, खेती-बाड़ी अऊ आजीविका संवर्धन के महत्वपूर्ण साधन बन चुके हे।
ग्राम पंचायत किशोरी म लगभग 20 साल जुन्ना तालाब उपेक्षा के सेती अनुपयोगी हो गए रहिस। वित्तीय साल 2022- 23 म पंचायत के प्रस्ताव म एला मिशन अमृत सरोवर के तहत पुनर्जीवित करे गीस। करीब 10 लाख रूपिया के लागत ले तालाब के जीर्णोद्धार करके एखर जलभराव क्षमता ल तीन गुना बढ़ाके 10 हजार घनमीटर कर दे गीस।
तालाब के पुनरुद्धार ले आसपास के किसान मन ल सीधा लाभ मिलत हे। किसान मनोज रक्सेल अऊ अरविन्द सिंह के तीन-तीन एकड़, जबकि सुरेन्द्र, लक्ष्मण, वीरेन्द्र अऊ आनंद के दो-दो एकड़ ले जादा जमीन अब सिंचित होवत हे। एखर अलावा जगबली यादव के लगभग सवा एकड़ ज़मीन घलोक ए सरोवर ले सींचे जात हे। किसान मन ह बताइस के अब ओ मन खरीफ के संग रबी के फसल घलोक लेहे लगे हे, जेखर से उंखर आमदनी म सुधार होय हे।
ग्राम पंचायत ह अमृत सरोवर ल आजीविका संवर्धन के रूप म स्थानीय महिला स्व-सहायता समूह ल लीज म उपलब्ध कराए गए हे। जय मां महिला स्व-सहायता समूह के सदस्य महिला मन ह ए तालाब ले बीते गरमी म 75 हजार रूपिया के मछली बेचके लाभ कमाइन। समूह के अध्यक्ष श्रीमती सोनकुंवर अऊ सचिव श्रीमती जीराबाई ह बताइस के ए साल लगभग तीन लाख रुपिया के मछली उत्पादन के भरोसा हे। ये पहल महिला मन बर अकतहा आय के जरिया अऊ पोषण संवर्धन के साधन बनत हे।
किशोरी ग्राम पंचायत के ये अमृत सरोवर आज केवल जल संरक्षण के साधन भर नइ हे, बल्कि किसान मन के समृद्धि अऊ महिला मन के आत्मनिर्भरता के चिन्‍हारी बन चुके हे। गांव वाले मन के कहना हे के अब ऊंखर जीवन म स्थायी बदलाव दिखत हे।