किसान मन के सरकार ह किसनहा बेटा मन ल सौंपीन किसान—कल्याण के जिम्मेदारी : मुख्यमंत्री दाउ भूपेश बघेल

रइपुर, 22 जुलाई 2021 बिरस्पत। मुख्यमंत्री दाउ भूपेश बघेल ह कहीन कि छत्तीसगढ़ के सरकार, किसान मन के सरकार हरे। राज्य म खेती-किसानी ल पोठहा बनाए अउ किसान मन के कल्याण अउ खुशहाली के जिम्मेदारी उन्कर सरकार ह किसनहा बेटा अउ किसानी ले जुड़े अनुभवी लोगन मन ल सौंपीन हे। मुख्यमंत्री आज अपन घरू कार्यालय ले छत्तीसगढ़ राज्य बीज अउ कृषि विकास निगम के नवनियुक्त अध्यक्ष श्री अग्नि चंद्राकर, सदस्य श्री जालम सिंह पटेल, श्री दिलीप पांडे अउ श्री शंकर बघेल के पदभार ग्रहण समारोह ल वर्चुअल रूप ले संबोधित करत रिहिसे । ये बेरा म कृषि मंत्री श्री रविन्द्र चौबे, स्कूल शिक्षा मंत्री डॉ. प्रेमसाय सिंह टेकाम, मुख्य सचिव श्री अमिताभ जैन, मुख्यमंत्री के अपर मुख्य सचिव श्री सुब्रत साहू उपस्थित रिहिन।
मुख्यमंत्री दाउ बघेल ह ये बेरा म बीज निगम के नवनियुक्त अध्यक्ष अउ सदस्य मन ल बधई देवत कहीन कि राज्य म कृषि के क्षेत्र अउ किसान मन के बेहतरी बर धान के संगे-संग आने फसल मन के अच्छा क्वालिटी के बीज के उत्पादन राज्य म होवय, किसान लाभकारी फसल के खेती बर आगू आवयं, ये उदीम हम सब ल करे के जरूरत हे। उन मन अध्यक्ष अउ सदस्य मन ल सहिरावत कहीन कि छत्तीसगढ़ के किसान भाई मन ल इन्कर अनुभव के लाभ मिलही।
कृषि मंत्री श्री रविंद्र चौबे ह कहीन कि छत्तीसगढ़ कृषि प्रधान राज्य हरे। राज्य के सर्वांगीण विकास अउ गांव मन म खुशहाली, कृषि उपर निर्भर हे। मुख्यमंत्री दाउ भूपेश बघेल के नेतृत्व म छत्तीसगढ़ सरकार के किसान हितैषी नीति अउ कार्यक्रम मन के चलत राज्य म भक्कम फसल उत्पादन होए लगे हे। अवइया बछर म एमा अउ जादा बढ़ोतरी होही। छत्तीसगढ़ राज्य बीज उत्पादन के मामला म बनेच आत्मनिर्भर बन जावय, ये हमार प्राथमिकता होना चाही। कार्यक्रम ल नवनियुक्त अध्यक्ष श्री अग्नि चन्द्राकर सम्बोधित करत कहीन कि किसान मन के बेहतरी बर छत्तीसगढ़ सरकार अउ किसान मन के बीज निगम उपर भरोसा रहय, इही हमार प्राथमिकता होही।