दुर्ग, डायरेक्टर एस. प्रकाश ह स्कूल म देहे जात, मध्यान्ह भोजन म उंचहा क्वालिटी के सामान के उपयोग अऊ ताजा हरियर साग-भाजी ल सामिल करे के निर्देश दिए हें। लोक शिक्षण संचालक श्री एस. प्रकाश ह आज दुर्ग अऊ राजनांदगांव जिला के आधा दर्जन स्कूल मन के उदुपहा जांच के बेरा म सबो स्कूल मन म किचन गार्डन विकसित करे के निर्देश दिए हें। उमन कहिन कि मध्यान्ह भोजन म हरियर साग-भाजी सामिल होए ले मध्यान्ह भोजन के पौष्टिकता बाढ़ही। एखर से लइका मन के शारीरिक अऊ मानसिक विकास बने सहिन होही।
लोक शिक्षण संचालक श्री एस. प्रकाश ह आज स्कूल शिक्षा विभाग कोति ले शिक्षा के गुणवत्ता म सुधार करे अउ शासन कोति ले देहे गए निर्देश मन के जमीनी स्तर म जायजा लेहे दुर्ग अउ राजनांदगांव जिला के आधा दर्जन स्कूल मन के जायजा लीन। उमन प्रायमरी, मीडिल, हाई व हायर सेकेण्डरी स्कूल संग ई साक्षरता केंद्र के घलोक आकस्मिक निरीक्षण करिन। निरीक्षण के समय ऊंखर संग लोक शिक्षण के असिस्टेंट डायरेक्टर महेश नायक अउ राज्य साक्षरता मिशन प्राधिकरण के असिस्टेंट डायरेक्टर श्री प्रशांत कुमार पाण्डेय घलोक रहिन।
डायरेक्टर एस प्रकाश ह बिहनिया 10 बजे दुर्ग जिला के धमधा विकासखंड मुरमुण्डा, सोनहार, धमधा, बरहापुर के प्रायमरी अउ मीडिल स्कूल के उदुपहा जांच करिन। इहां राज्य स्तरीय आँकलन के परीक्षण करके उमन ये निर्देश दीन कि लइका मन के आँकलन के बाद ऊंखर नंबर अउ उंखर स्थिति के सम्बन्ध म लइका मन अउ ऊंखर पालक मन ल अवगत कराए जाय। राज्य स्तरीय आँकलन संबंधी गतिविधि चार्ट स्कूल मन म अनिवार्य रूप ले प्रदर्शित करे जाय। उमन कहिन कि शिक्षा के वातावरण शिक्षा ले बनथे, जेखर सेती स्कूल साफ-सुथरा अउ आकर्षक बनाए जाय। स्कूल मन म उपलब्ध राशि के उपयोग करके ओखर रंग रोगन कराए जाए। फूल अउ आकर्षक पौधा लगाए जाए। उमन लइका मन ल कई विषय के पाठ पढ़वाइन, पढ़इया लइका मन ल चॉकलेट देके पुरस्कृत करिन अऊ कमजोर लइका मन ल पढ़े बर प्रोत्साहित करिन।
डायरेक्टर एस प्रकाश ह कड़ाई ले ये निर्देश दीन कि 3 दिन के भीतर सबो स्कूल मन म किचन गार्डन अनिवार्य रूप ले बनाए जाना ठडका करव। उमन सख्त लहजा म कहिन जऊन स्कूल मन म किचन गार्डन नइ बनही उहाँ के प्रभारी के संग शिक्षक मन उपर घलोक कार्यवाही होही। उमन लर्निंग आउटकम स्थिति संबंधी चार्ट सबो स्कूल मन म लगाए जाय के निर्देश दीन।
डायरेक्टर एस. प्रकाश ह राजनांदगाँव जिला के खैरागढ़ मुख्यालय स्थित पदुमलाल पुन्नालाल बख्शी स्कूल के आकस्मिक निरीक्षण करिन। उहां उमन 11वीं अउ 12वीं के बोर्ड के अर्धवार्षिक परीक्षा के अवलोकन करिन। उमन ये ऐतिहासिक स्कूल के व्यवस्था सुधारे अऊ साफ-सफाई करके एला आकर्षक बनाए बर निर्देशित करिन। ये 125 साल ले जादा जुन्ना स्कूल म अविभाजित मध्य प्रदेश के पहिली मुख्यमंत्री पण्डित रविशंकर शुक्ल प्रधान अध्यापक के रूप म अउ साहित्यकार पदुमलाल पुन्नालाल बख्शी घलोक काम करे हें। अइसन ऐतिहासिक स्कूल ल साफ-सुथरा रखके साईकिल स्टैंड आदि व्यवस्थित करके एला अऊ आकर्षक बनाय जा सकत हे। उमन बढ़ईटोला के हायर सेकेण्डरी स्कूल के अवलोकन करके उहाँ ओ परिसर म बनाये गए गार्डन के तारीफ करत कहिन ये एक संयोग हे कि इहां प्रायमरी, मीडिल, हाई अउ हायर सेकेण्डरी स्कूल एक संग लगथे। जेखर सेती सबो स्कूल के प्रभारी शिक्षक अउ लइका मन के संग गार्डन के विस्तार करव अउ उपयुक्त स्थल के चयन करके किचन गार्डन बनाव। श्री एस. प्रकाश ह संझा 6 बजे राजनांदगाँव के नंदाई चौक म मुख्यमंत्री शहरी साक्षरता कार्यक्रम के अंतर्गत ई-साक्षरता केंद्र के अवलोकन करिन। इहां उमन ई-साक्षरता केंद्र के बड़का साइन बोर्ड मुख्य द्वार म लगाके केंद्र ल आकर्षित बनाए शिक्षार्थी मन के संख्या म बढ़ोतरी करके बहुत संख्या म कम्प्यूटर आदि के व्यवस्था करे के निर्देश दीन।
