रायपुर, 28 जनवरी 2020। मुख्यमंत्री भूपेश बघेल सोमवार के शहीद स्मारक भवन म आयोजित नायकर जिंदा हे कार्यक्रम म पहुंचिन. कार्यक्रम के आयोजन वरिष्ठ पत्रकार अउ साहित्यकार राजकुमार सोनी के वेब पोर्टल अपन मोर्चा कोति ले करे गए रहिस। ये मौका म मुख्यमंत्री संग कार्यक्रम म सकलाए मनखे मन ह जमके ठहाका लगाइन।
कार्यक्रम म भूपेश बघेल ह कहिन कि पहिली नायकर साहब ल टेप रिकॉर्डर म सुनत रहेन, मोला पता नइ रहिस के नायकर साहब ज़िंदा हें। नायकर अभी ज़िंदा हे, ज़िंदा रइहीं, वोकर जस बने रहय। ये मउका म नायकर ह कहिन कि छत्तीसगढ़ ले मोला बिकट मया हे, मैं आज इहां आके बहुत रोए हंव, अभी तको आंखी भींजे हे। अइसे बोलत उमन भावुक हो गंए। उमन कहिन कि मोला जतका मया इहां के दर्शक मन ले मिलीस वोतका कहूं नइ मिले हे। ये कार्यक्रम म मंत्री मोहम्मद अकबर, विधायक बृजमोहन अग्रवाल, संपादक हिमांशु द्विवेदी के संग सैकड़ों मनखे मौजूद रहिन।
