रायगढ़, 24 अगस्त 2021। कैलाश नाथ काटजू सरकारी स्कूल म चाकू ले हमला कर के एक स्कूली छात्र ल मौत के घाट उतार देहे गीस। हत्या के बाद आरोपी घटना स्थल ले फरार हो गीस। देखईया मन के के कहना हे के आरोपी स्कूल के भीतर घुसर के चाकू ले ताबड़तोड़ हमला करिस, जेखर से एक छात्र के मौत हो गे। मृत छात्र के नाम सागर टंडन बताए जात हे, जेन ये स्कूल के क्लास 9वीं के छात्र रहिस। छात्र ल स्कूल के आन छात्र मन ह ऑटो के सहायता ले हॉस्पिटल लेजिन।
कोतवाली पुलिस मौका म पहुचके जांच म जुट गए हे। घटना के बाद ले पूरा मोहल्ला म सन्नाटा छा गए हे। आस-पास के मनखे मन के बताति आरोपी के शिनाख्त हो गए हे। देखईया मन के मुताबिक तनु नाम के युवक ह हत्या के वारदात ल अंजाम देहे हे, जेला पुलिस खोजत हे।
जानबा हे के रामभांटा स्कूल हमेशा ले विवाद म रहे हे। इहां आए दिन बाहरी लइका मन के जमावड़ा स्कूल के अंदर बाहिर लगे रहिथे, फेर स्कूल प्रबंधन ह कभू ध्यान नइ देवय, जेकर सेती आज ये घटना घटित हो गे। स्कूली छात्र जब घायल अवस्था म अपन गुरूजी मन तीर पहुंचिस, त उमन छात्र ल न तो हॉस्पिटल पहुंचाइन अऊ ना ही ओखर सुध लीन। मृतक छात्र के संगी मन ह ऑटो म छात्र ल जिला चिकित्सालय लेजीन।
स्कूल म एक छात्र उपर चाकू ले हमला, लहूलुहान छात्र के गुरूजी ह नइ करिस मदद, होगे मौत
