कोदो के खेती कोति किसान मन के बाढ़त रुझान

’कम लागत म जादा लाभ’
रायपुर, छत्तीसगढ़ म धान के खेती के संगे-संग अब किसान मन के रुझान लाभकारी अउ पोषक फसल मन कोति बढ़त जात हे। विशेषकर वनांचल क्षेत्र के गांव मन म कोदो के खेती ल अपनाने वाले किसान मन के संख्या म उल्लेखनीय वृद्धि हो गए हे। कम लागत अउ कम श्रम म जादा लाभ के संगे-संग स्वास्थ्यवर्धक गुण ले भरपूर कोदो फसल के मांग ल देखत एखर रकबा म सरलग बढ़ोतरी होवत हे। बालोद जिला के गुरूर विकासखण्ड के ग्राम बड़भूम, पेटेचुवा, दुग्गा बाहरा, कर्रेझर संग बहुत अकन गांव मन म किसान मन कोति ले ए साल बडेका पैमाने म कोदो के खेती करे जात हे।
गुरूर विकासखण्ड के वनग्राम दुग्गा बाहरा के किसान धनीराम ह खरीफ साल 2025-26 म राष्ट्रीय कृषि विकास योजना (रफ्तार) के अंतर्गत प्राप्त सहयोग ले 3 एकड़ जमीन म कोदो के खेती करत हे। पहिली धनीराम केवल धान के खेती करत रहिस, फेर कृषि विभाग कोति ले कोदो के खेती के प्रति जागरूकता के प्रयास के चलते वो ह ए लाभकारी फसल के खेती ल अपनाए हे।
कोदो के खेती ल प्रोत्साहित करे बर राष्ट्रीय कृषि विकास योजना के अंतर्गत धान के जगा म वैकल्पिक फसल अपनइया किसान मन ल प्रति एकड़ 11,000 रूपिया के अनुदान घलोक प्रदान करे जात हे। ए योजना ले किसान मन ल आर्थिक संबल प्राप्त होवत हे अउ ओ मन कम लागत म जादा मुनाफा अर्जित करत हे।
कोदो एक बहुत उपयोगी अउ पौष्टिक फसल हे, जेमां फाइबर, प्रोटीन, जरूरी विटामिन अउ खनिज भरपूर मात्रा म पाए जाथे। ये मधुमेह, मोटापा अउ हृदय रोग के रोकथाम म घलोक सहायक सिद्ध होवत हे। एखर खेती म रासायनिक उर्वरक अउ कीटनाशक मन के जरूरत घलोक अपेक्षाकृत कम होथे। उच्चहन जमीन म कोदो के खेती करके किसान जादा उत्पादन प्राप्त कर सकत हे।
कृषि विभाग कोति ले किसान मन ल कोदो के खेती बर तकनीकी मार्गदर्शन अउ जरूरी सहयोग लगातार उपलब्‍ध कराए जात हे। विभागीय अधिकारी मन ह गांव-गांव जाके किसान मन ल कोदो के उपयोगिता अउ एखर लाभ के जानकारी देहे जात हे, जेकर से
ए फसल के खेती कोति किसान मन के रूझान बाढ़े हे।