बैंक सखी बनके 5 करोड़ तक लेन-देन करइया जानकी बनीस सफल उद्यमी
कोण्डागांव, कोण्डागांव जिला के माकड़ी ब्लॉक के ग्राम कालीबेड़ा के रहइया दिव्यांग जानकी नाग आज छत्तीसगढ़ के आन महिला मन बर प्रेरणास्रोत बन गे हे। जानकी बचपन ले ही दिव्यांग हे वो अपन शारीरिक चुनौति मन के बावजूद जीवन म संघर्ष करत आज समाज म एक सफल उद्यमी के रूप म अपन पहिचान बनाय हे। जानकी ह अपन आत्मविश्वास के बलबूता दिव्यांगता ल अपन सफलता के रद्दा म रोड़ा बने नइ दीस। अपन मजबूत हौसला अऊ आत्मविश्वास के बल म वो ह न केवल अपन परिवार के आर्थिक स्थिति म सुधार करिस, भलुक कई गांव वाले मन ल बैंकिंग सेवा उपलब्ध कराके ओ मन ल आत्मनिर्भर बने के अवसर घलोक दीस।
जानकी नाग के जन्म एक सामान्य परिवार म होइस, जिहां वोखर माता-पिता अऊ तीन भाई हे। वोखर पिता खेती ले घर चलात रहिस फेर आमदनी अतका नइ रहिस के परिवार के जरूरत पूरा हो सकय। जानकी ह ए आर्थिक चुनौती के सामना करे बर साल 2012 म गांव के मां सरस्वती स्व सहायता समूह ले जुड़े के निर्णय लीस। जानकी ग्रेजुएट हे अऊ वोखर समूह के आन महिला मन पढ़े-लिखे नइ रहिन, ते पाए के ओ ल समूह के लेखा-जोखा रखे के काम मिलीस। तभे ले जानकी के जीवन यात्रा म नवा मोड़ आइस।
बैंक सखी के रूप म गांव वाले मन तक पहुंचाईस योजना मन के लाभ
जानकी के जीवन म एक बड़ाका बदलाव तब आइस जब वो ह बिहान के पीआरपी दीदी ले जानिस के ओ बैंक सखी बनके अपन गांव म रहि के बैंकिंग सेवा प्रदान कर सकत हे। नवंबर 2019 म वो ह ग्रामीण बैंक के बैंक सखी बने के निर्णय लीस। ये फैसला वोखर बर एक महत्वपूर्ण मोड़ साबित होइस। बैंक अधिकारी मन अऊ बिहान के सहयोग ले जानकी ह अपन गाँव म बैंकिंग सेवा शुरू करिस जेखर से धीरे-धीरे ग्रामीण वोखर पास अपन बैंकिंग लेन-देन बर आए लगिन। जानकी ह गांव के मनखे मन ल खाता खोले, पइसा जमा करे, निकासी अऊ ट्रांसफर जइसे बैंकिंग सेवा प्रदान करिस। एखर अलावा वो ह प्रधानमंत्री जीवन ज्योति बीमा योजना अऊ सुरक्षा बीमा योजना के लाभ घलोक गांव वाले मन तक पहुंचाइस। अब तक वो लगभग 250 बचत बैंक खाता खोले हे अऊ 3000 मनरेगा मजदूर मन अऊ 4000 पेंशनभोगी मन ल बैंकिंग सेवा के लाभ पहुंचा डरे हे। ए प्रकार ले जानकी अब तक 5 करोड़ तक के लेन देन कर डरे हे।
सीएससी सेवा मन ले घलो आय म होइ बढ़ोत्तरी
जानकी ह 2020 म कॉमन सर्विस सेंटर के सेवा घलोक शुरू करिस जेखर माध्यम ले वो गांव वाले मन ल आयुष्मान कार्ड, ई-श्रम कार्ड, बिजली बिल भुगतान अऊ मोबाइल रिचार्ज जइसे सुविधा प्रदान करत हे। अब तक वो ह 450 ले जादा आयुष्मान कार्ड, 200 ईश्रम कार्ड अऊ 500 ले जादा बिजली बिल के भुगतान करे डरे हे। ए सेवा मन के माध्यम ले गांव वाले मन ल न केवल सुविधा मिलीस, भलुक जानकी ल घलोक अपन आय बढ़ाए के अवसर मिले हे।
कड़ा मेहनत अऊ समर्पण ले बनीस एक सफल उद्यमी
जानकी के कड़ा मेहनत अऊ समर्पण ह ओला एक सफल उद्यमी बना देहे हे। बैंकिंग अऊ सीएससी सेवा मन के संग जानकी अब हर महीना करीबन 6 हजार रुपिया कमाथे अऊ एक महिना म वो सबले जादा 10 हजार रुपिया तक के कमीशन अर्जित करे हे। ओखर ये काम न केवल ओ मन ल आर्थिक रूप ले सशक्त बनावत हे, भलुक वोखर परिवार के आर्थिक स्थिति म घलोक बड़का बदलाव लेके आए हे। जानकी ह अपन परिवार ल आर्थिक सहयोग प्रदान करके एक ट्रैक्टर अऊ एक कार खरीदे म मदद करे हे। वोखर भाई अब ट्रैक्टर के संग रोजगार पावत हे, जेखर से परिवार के आय म घलोक बढ़ोतरी होए हे।
जानकी बताथे के वोखर घर म पहिली ट्रैक्टर नइ रहिस फेर अब वोखर मदद ले एक ट्रैक्टर बिसाए गीस जेन वोखर भाइ बर रोजगार के साधन बन गए हे। एखर अलावा वोखर परिवार ह छै महीना पहिली एक कार घलोक बिसाए हे जेखर बर वो ह आर्थिक सहयोग करे हे। जानकी के ये योगदान वोखर परिवार के स्थिति ल स्थिर अऊ बेहतर बनाए म मददगार साबित होय हे।