- रैली मे ग्रामीण संस्कृति के होही महक, स्थानीय खेल मन के रंग ले रंगही गांव
- कलेक्टर कोति ले बाईक रैली बर विभाग मन ल दिए गीस जुम्मेदारी
कोण्डागांव, 20 फरवरी 2020। कोण्डागांव जिला के अंदरूनी इलाका म विकास बर जन जागरूकता फैलाय के उद्देश्य ले कलेक्टर श्री नीलकण्ठ टीकाम के मार्गदर्शन म 23 फरवरी ले आयोजित होवइया बाईक रैली ’पुनांग हर्री त पण्डुम रैली’ बर पंजीयन के काम चालू हो गए हे। जम्मों विभाग मन के कर्मचारी अधिकारी अपन-अपन विभाग के सूची जेमा नाम, मोटरसाइकिल के रजिस्ट्रेशन नंबर सहित अनुविभागीय अधिकारी (राजस्व) कोण्डागांव, फरसगांव, केशकाल ल या जिला के पांचों विकासखंड के मुख्य कार्यपालन अधिकारी जनपद पंचायत ल सौंप सकत हें।
जनसामान्य घलोक करा सकहीं रैली बर पंजीयन
जिला के जन सामान्य अउ नागरिकगण घलोक अपन पंजीयन जनपद पंचायत मुख्यालय म करवा सकत हें। एखर अलावा विकासखंड के बीआरसी कार्यालय, विकास खंड शिक्षा अधिकारी कार्यालय अउर खेल अउर युवा कल्याण विभाग कार्यालय विकास नगर कोण्डागांव म घलोक पंजीयन करवा सकत हें।
रैली मर्दापाल पंचायत भवन ले चालू होके 142 किलोमीटर के यात्रा के बाद मुरनार (खालेमुरवेंड) गौठान म खतम होही। रैली म पंजीकृत सबो भाग लेवईया मन ल टी-शर्ट अउर कैप कार्यालय सीईओ जिला पंचायत कोति ले प्रदान करे जाही। रैली के 142 किलोमीटर के यात्रा म भाग लेवइया अपन सुविधा मुताबिक दूरी घलोक तय कर सकत हें। ये रैली 23 फरवरी 2020 (इतवार) के बिहन्चे 09 बजे मर्दापाल ले चालू होही अऊ बयानार, चलका, चिंगनार, भोंगापाल, कोनगुड़, धनोरा, कुएं, रांधा होत मुरनार (खालेमुरवेण्ड) म खतम होही। इही जगा मन म खेलकूद प्रतियोगिता आयोजित होही जेमां तल्ला पे मल्ला तासी पिताना, डोप्पा, कोटाना, कुर्सी दौड, रस्सा खींच, कबड्डी, वालीवाल, वटुल गुलेन ते टिपाना, वर्किंग भारा कॉजी विताना सामिल हे संगेच लोकनृत्य, नाटक के घलोक प्रदर्शन होही । भोजन अउर नाश्ता पानी के व्यवस्था ग्रामीण यांत्रिकी सेवा विभाग, लोक निर्माण विभाग, जल संसाधन विभाग, पीएमजीएसवाय अउर खाद्य विभाग कोति ले संघरा करे जाही। पूरा रैली मे सुरक्षा व्यवस्था के कार्यभार अकतहा पुलिस अधीक्षक अऊ चिकित्सा व्यवस्था के जिम्मेदारी मुख्य चिकित्सा अधिकारी ह देखहीं। एखर बर रैली के संग आपात स्थिति बर ऐम्बुलेंस घलोक होही, संगेच रस्दा म हर एक गांव म सांस्कृतिक कार्यक्रम के व्यवस्था सहायक आयुक्त आदिवासी विकास शाखा कोति ले करे जात हे। रैली के रस्ता के बहुत लम्बाई ल देखत चिन्हित 08 थिरावन जगा म चलित अस्थाई शौचालय के व्यवस्था लोक स्वास्थ्य यांत्रिकी विभाग कोति ले करे जात हे।
सुरता राखव के प्रतिभागी मन के पंजीयन के जिम्मेदारी सबो अनुविभागीय अधिकारी मन (राजस्व) अउ सबो मुख्य कार्यपालन अधिकारी जनपद पंचायतो ल सौपे गए हे।