मितानिन, आंगनबाड़ी कार्यकर्ता, सहायिका मन ह मानव श्रृंखला ले बनाइन 100 के चिनहा
कोण्डागांव, बिरसपत के देश म 100 करोड़ वैक्सिनेशन के लक्ष्य पूरा होए के खुसी म दहिकोंगा म 100 प्लस टीकाकरण डोज समारोह के आयोजन करे गीस। ये बेरा म मुख्य चिकित्सा अउ स्वास्थ्य अधिकारी डॉ. टी.आर. कुंवर अउ ग्राम सरपंच सनाय नेताम के अध्यक्षता म समारोह आयोजित करे गीस। जिहां डॉ. टी.आर. कुंवर ह कहिन कि टीकाकरण अभियान के समय सबो विभाग मन के समन्वय ले मनखे मन ल टीका लगाय के काम पूरा करे जात हे। ये मा जिला के मितानिन अउ आंगनबाड़ी कार्यकर्ता मन के विशेष योगदान रहे हे। टीकाकरण अभियान बर सबो कार्यकर्ता मन ल बहुत अकन विरोध अउ अफवाह मन के घलोक सामना करना परे रहिस। जेखर से काखरो भी मनोबल डगमगा सकत रहिस। फेर मितानिन अउ आंगनाबाड़ी कार्यकर्ता, सहायिका मन ह जमीनी स्तर म जागरूकता के प्रसार करके मनखे मन ल टीकाकरण केन्द्र तक लाय के काम करिन। ते पाए के आज जिला म 98 प्रतिशत 45 ले जादा आयु वर्ग के मनखे मन ल, अऊ 68 प्रतिशत ले जादा 18 ले 44 साल के युवा मन ल कोरोना के टीका लगाये गए हे।
ये बेरा म सबो आंगनबाड़ी कार्यकर्ता अउ मितानिन मन ल प्रोत्साहित करत कोरोना काल म ऊंखर योगदान बर सबो अतिथि मन कोति ले आभार व्यक्त करे गीस अऊ सबो ल स्वल्पाहार घलोक कराए गीस। ये बेरा म पीएचसी कोण्डागांव म घलोक 100 करेाड़ डोज के उपलक्ष्य म रंगोली बनाके अउ केक काटके सबो स्वास्थ्य विभाग के कर्मचारी मन कोति ले एला उत्सव के रूप म मनाए गीस।
ये बेरा म आये मितानिन, आंगनाबाड़ी कार्यकर्ता, सहायिका अऊ शिक्षक मन ह मिलके 100 करोड़ टीकाकरण डोज पूरा होए म मानव श्रृंखला ले 100 के चिनहा बनाके रंग बिरंगा फुग्गा के माध्यम ले हर्ष व्यक्त करिन। ये समारोह म बीएमओ सूरज सिंह राठौर, नंदकिशोर दीवान, प्राचार्य टीपी जोशी, डीआईओ रूद्र कश्यप, यूनिसेफ के सिमरन कौर, स्वास्थ्य विभाग के तरफ ले झम्मन वर्मा, नीरज सोरी, सुनिता सरकार, शशिकला पोयाम, सुपरवाईजर संतराम नाग घलोक सामिल होइन।
