साकार होही उत्पादन ल बढ़ाए के सपना: आधुनिक कृषि ले आय बढ़ाए के बुलंद होइस हौसला
कोण्डागांव, 05 मई 2020। सपना कई मनखे देखथें फेर ओ ल साकार करे के दम कुछेक मनखे रखथें, अइसनहे जनजातीय समुदाय के उदीम करइया किसान मन ल राज्य सरकार के अनुसूचित जन जाति ट्रेक्टर ट्राली योजना ले जोड़ के ऊंखर सपना ल पूरा करे के उदीम करे जात हे। जानबा होए हे के रघुराम नाग, पिता रामसाय नाग विकासखण्ड बडे़राजपुर के एक छोटकन गांव ढोन्ढरा के किसान ये जऊन अपन पुश्तैनी बारा एकड़ खेती म कई बरिस ले खेती करत रहिस। वोकर आधुनिक कृषि म रुचि ल देख के जिला अंत्यावसायी सहकारी समिति के कार्यपालन अधिकारी बाबू भाई श्रीवास ह वोला सरकार के योजना के संबंध म बताइस। रघुराम ह जानकारी ले के कलेक्टोरेट म स्थित जिला अंत्यावसायी सहकारी विकास समिति कार्यालय म संपर्क करिस। वो ह अनुसूचित जनजाति ट्रेक्टर ट्राली योजना के तहत ऋण लेके ट्रेक्टर बिसाये के योजना के लाभ लेके किसानी ल अऊ बेहतर बनाए के इच्छा व्यक्त करिस। एखर बर वो जिला अत्यावसायी सहकारी समिति के कार्यालय म आवेदन प्रस्तुत करिस। आवेदन के स्क्रूटनिंग कलेक्टर के अध्यक्षता म गठित समिति ह करिस। जेमां रघुराम नाग ल ए योजना के हितग्राही के रूप म चुने गीस। आज जिला के विधायक मोहन मरकाम अउ कलेक्टर नीलकण्ठ टीकाम ह रघुराम ल ट्रेक्टर के चाबी ओखर बेहतर भविष्य के कामना करत दीन।
हम आप ल बता देवन के राज्य शासन ह जनजातीय उन्नतशील किसान मन ल सहायता करे बर बाजार दर ले कम दर म जिला के जनजातीय कृषक मन ल अनुसूचित जनजाति ट्रेक्टर ट्राली योजना के तहत लाभ प्रदान करत हे। आज रघुराम ह बताइस के वो ट्रेक्टर पा के बिकट खुश हे अऊ ओ ह शासन अउ जिला प्रशासन के सहयोग बर धन्यवाद देत कहिस के योजना के तहत ट्रेक्टर मिले ले अब अपन खेती-किसानी के सबो काम बेरा म कर सकही अऊ खेती के बाद बचे समय म ओ ह एकर उपयोग परिवहन के रूप म घलोक करही। जेखर से ओखर आय म वृद्धि के संग खाली समय म आजीविका घलोक प्राप्त होही। रघुराम अपन खेत मन म खरीफ के मौसम म धान के कृषि करते हे अउ आन मौसम म मौसमी फल सब्जी अऊ दाल के उत्पादन करथे। ए मौका म विधायक अउ कलेक्टर ह रघुराम ल भविष्य बर शुभकामना देवत कहिन के जिला के आन जनजातीय कृषक मन ल घलोक आगू आके अपन सपना ल पूरा करे बर शासन के योजना मन के लाभ उठाए के जरुरत हे एखर बर शासन-प्रशासन हर संभव मदद करही।