श्रद्धा सुमन समूह के चालीस महिला मन लगिन कोसा उत्पादन अउ विक्रय म : 30 प्रतिशत तक होवत हे लाभ
रायपुर, छत्तीसगढ़ के चांपा के कोसा अऊ कोसा उत्पाद मन के ख्याति देश भर म ही नहीं भलुक विदेश मन तक फैले हे, फेर अब चांपा के कोसा अऊ कोसा उत्पाद मन ल कोरबा के उमरेली ब्रांड कोसा उत्पाद मन ले चुनौती मिले लगे हे। कोरबा जिला के करतला विकासखंड के उमरेली गांव म 40 महिला सदस्य नियमित रूप ले कोसा उत्पादन इकाई म धागा निकाले, धागा ल रंगे, कपड़ा के डिजाईनिंग अऊ ओला बुने के काम म लगे हें। उमरेली गांव के नाम म ही कोरबा के ये कोसा अऊ ओखर उत्पाद मन ल उमरेली ब्रांड नाम ले बेचे जात हे। प्रदेश अऊ प्रदेश के बाहिर लगइया बुनकर मेला, सरस मेला, क्राफ्ट अऊ व्यापार मेला मन म श्रद्धा सुमन महिला ग्राम संगठन कोति ले उमरेली ब्रांड कोसा उत्पाद मन के बिक्री करे जात हे अऊ उत्पादन लागत ले 30 प्रतिशत जादा तक लाभ कमावत हें। उमरेली ब्रांड कोसा ले स्वसहायता समूह के चालीस महिला मन ल ही नहीं भलुक गांव के 24 समूह मन के 265 परिवार मन ल नियमित रोजगार मिलत हे। गांव के दू सौ ले जादा परिवार ये कोसा व्यवसाय म अपन भागीदारी निभात हें।
श्रद्धा सुमन महिला ग्राम संगठन के अध्यक्ष श्रीमती माया देवांगन बताथें कि पहिली गांव के मनखे कोरबा ले कोसा कूकून सकेल के चांपा के व्यापारी मन ल औने-पौने दाम म बेच देवत रहिन। चांपा के व्यापारी मन कोति ले कोसा के धागा ल मनमाने दाम म गांव वाले मन ले खरीदे जात रहिस। जिला प्रशासन के सहयोग ले गांव म ही स्वसहायता समूह के गठन करके कोसा प्रसंस्करण अउ उत्पादन इकाई के शुरूआत करे गीस। बिहान कार्यक्रम के तहत उमरेली म ही कोसा सिल्क एम्पोरियम घलोक शुरू करे गीस। गांव के 24 समूह मन ल कोसा उत्पादन, प्रसंस्करण, धागाकरण, रंगाई, बुनाई, डिजाईनिंग आदि काम मन के प्रशिक्षण देवाए गीस। पूरा काम सीख लेहे के बाद जिला पंचायत कोरबा कोति ले दू लाख रूपिया के सहायता बिहान कार्यक्रम के तहत देवाए गीस। छै महीना म ही समूह के काम, कोसा उत्पाद मन के क्वालिटी अऊ लगन देखके जिला खनिज न्यास मद ले काम ल अऊ विस्तारित करे बर साढ़े चार लाख रूपिया के सहायता घलोक देहे गीस। श्रीमती माया देवांगन ह बताइस कि सदस्य मन कोति ले तियार करे गये कोसा साड़ी, चुनरी, साल, कुर्ता अउ आन कोसा सिल्क उत्पाद मन के विक्रय एम्पोरियम के संगें-संग देश के कई ठन राज्य मन म आयोजित होवइया व्यापार मेला मन घलोक करे जात हे। महिला मन ल इकर उत्पादन लागत ले 25 ले 30 प्रतिशत तक के अकतहा लाभ घलोक होवत हे। हाले म पश्चिम बंगाल, झारखंड, मध्यप्रदेश अऊ महाराष्ट्र म लगे व्यापार मेला मन म उमरेलिया ब्रांड कोसा उत्पाद मन के खूब मांग रहिस हे अऊ ए मेला मन म समूह ह करीबन पांच लाख रूपिया के व्यापार करिस।
समूह के सचिव श्रीमती उमा यादव सदस्य श्रीमती उर्मिला अऊ उषा देवांगन घलोक आन दुसर सदस्य मन के जइसे मजदूर ले मालिक बनके अपन चेहरा म आत्मविश्वास ले भरे मुसकान बगरात बताइन कि जऊन काम बर पहिली मजदूरी के रूप म दू सौ ले तीन सौ रूपिया मिलत रहिस। आज उही काम ल बने सहिन सीखके कोसा ले संबंधित कई प्रकार के साड़ी, चुनरी, सॉल, कुर्ता आदि बनाके अब मालिक के रूप म एक हजार ले तीन हजार रूपिया तक कमावत हें। श्रीमती उमा यादव ह बताइस कि बड़े-बड़े शहर मन के व्यापारी अऊ आनलाईन मार्केटिंग कंपनी मन घलोक उमरेली ब्रांड कोसा सिल्क के मांग करे लगे हें।
कलेक्टर घलोक पहुंचे रहिस केंद्र, बाउंड्रीवाल अऊ फर्शीकरण के दीन मंजूरी- कलेक्टर ह घलोक ये केन्द्र म पहुंचके महिला समूह के सदस्य मन ले ट्रेनिंग, रेलिंग, कलरिंग, बुनाई संग सबो काम मन के जानकारी लीन अऊ अच्छा काम करके आत्मनिर्भर होए बर प्रोत्साहित करिन। कलेक्टर ह समूह के मांग म केन्द्र बर बाउंड्रीवाल बनाए अऊ आगू कोति फलोरिंग कराए के घलोक स्वीकृत दीन। उमन ये काम म अऊ जादा मनखे मन ल जोड़े के आव्हान करिन।
