मुख्यमंत्री श्री भूपेश बघेल ह महोरा गौठान के करिन निरीक्षण : गोबर ले बने सरस्वती जी के प्रतिमा उपर फूल चढ़ा के करिन नमन

कोरबा, 04 जनवरी 2021। मुख्यमंत्री श्री भूपेश बघेल ह आज अपन दू दिने कोरबा जिला के दौरा के बेरा म करतला तहसील के ग्राम मोहरा म शासन के महत्वाकांक्षी योजना नरवा, गरुवा, घुरूवा बाड़ी के अंतर्गत बने गौठान के निरीक्षण करिन। उमन गौठान म मवेसी मन के चारा-पानी अऊ सुरक्षा प्रबंध के मुआयना करिन। मुख्यमंत्री ह गौठान म महिला स्व-सहायता समूह मन कोति ले गोबर ले बने कई प्रकार के उत्पाद मन के जानकारी लीन। उमन गोबर ले बने गौकाष्ठ, गमला आदि उत्पाद बनाए के विधि के बारे म जानकारी लीन अऊ वोला सहराइन। मुख्यमंत्री श्री बघेल ह गौमाता ल अपन हाथ ले चारा खवाईन अऊ आशीर्वाद लीन। ये बेरा म विधानसभा अध्यक्ष डॉ. चरणदास महंत, लोकसभा सांसद श्रीमती ज्योत्सना महंत, स्कूल शिक्षा मंत्री डॉ. प्रेमसाय सिंह टेकाम, राजस्व मंत्री श्री जय सिंह अग्रवाल, संसदीय सचिव सुश्री शकुन्तला साहू, जिला पंचायत कोरबा के सदस्य श्रीमती प्रीति कंवर, पोड़ी उपरोड़ा जनपद अध्यक्ष श्रीमती सन्तोषी पेन्द्रो संग जनप्रतिनिधि, किसान अउर पशुपालक उपस्थित रहिन।
मुख्यमंत्री श्री बघेल ह गौठान परिसर म महिला समूह मन कोति ले सजाए गे मण्डप मन के घलोक अवलोकन करिन। उमन उपस्थित महिला मन ले चर्चा करिन अऊ ऊंखर अनुरोध म गौठान म आजीविका के आन साधन उपलब्‍ध कराए के हुकुम तको कलेक्टर ल दीन। करीबन 26 लाख रूपिया के लागत ले बने ये गौठान म चारा, पानी, शेड, उपचार संग मवेसी मन के संरक्षण के उत्तम व्यवस्था हे। गौठान म करीबन 375 मवेसी मन ल रखे गए हे। उमन महिला स्व सहायता समूह मन कोति ले गौठान बर 7 एकड़ म लगाए गए चारागाह अऊ बाड़ी के घलोक निरीक्षण करिन।
मुख्यमंत्री श्री बघेल ले चर्चा के समय हरे कृष्णा स्व सहायता समूह के सदस्य मन ह बताइन के गौठान म गोबर खरीदी करके वर्मी कम्पोस्ट खाद घलोक तियार करे जात हे। उमन बताइन के अब तक 180 क्विंटल वर्मीकम्पोस्ट तियार करके 165 क्विंटल खाद विक्रय करे जा चुके हे। मुख्यमंत्री श्री बघेल ह समूह के सदस्य मन कोति ले आजीविका संवर्धन बर 5 सिलाई मशीन के मांग उपर सहमति प्रदान करिन। संगेच ये बेरा म कोसा धागाकरण काम ले जुड़े पूजा स्व सहायता समूह ल 10 हजार 150 रूपिया के चेक घलोक प्रदान करिन। ये दौरान उहां उपस्थित ग्रामीण श्री हीरासाय ह मुख्यमंत्री श्री बघेल ल बताइस के वो ह पाछू 4 महीना म गोधन न्याय योजना के तहत गोबर बेचके करीबन 13 हजार रूपिया के आय प्राप्त करे हे। वो ह मुख्यमंत्री श्री बघेल ल ये योजना बर आभार व्यक्त करत कहिस के हम गरीब मन बर ये कल्याणकारी योजना हे।
पोल्ट्री व्यवसाय ले जुड़े महिला मन ह मुख्यमंत्री श्री बघेल ले चर्चा करत बताइन के करीबन 300 कुकरी पाले गए हे अऊ कलिंगा ब्रॉउन प्रजाति के 30 देशी कुकरा घलोक रखे गए हे। मुख्यमंत्री ह अंडा के कीमत पूछिन त सदस्य मन ह बताइन के प्रति नग 10 रूपिया के दर ले अंडा बेचत हन। श्री बघेल ह अन्डा के उत्पादन म बढ़ोतरी करके जिला के आंगनबाड़ी म आपूर्ति करे के बात कहिन जेखर से कुपोषण के खिलाफ लड़ाई म शासन ल सहायता मिल सकय।
गौठान परिसर म वन अऊ जलवायु बदलाव विभाग कोति ले लगाए गए स्टाल म स्व-सहायता समूह के महिला मन ह मुख्यमंत्री ल हर्बल वनौषधि के टोकरी भेंट करत बताइन के समूह ह 18 प्रकार के वनौषधि बनावत हे जेमें त्रिफला, मधुमेह नाशक, हर्बल कॉफी जइसन उत्पाद सामिल हे। मुख्यमंत्री श्री बघेल ह उहां उपस्थित वन विभाग के अधिकारी मन ल जादा ले जादा वनोपज मन के प्रसंस्करण करके मूल्य संवर्धन के बात कहीन जेखर से समूह ले जुड़े महिला मन के आय म बढ़ोतरी हो सकय।
महिला मन कोति ले गौठान म बने गोबर के दीया अऊ गणेश जी के प्रतिमा घलोक भेंट करिन। ये बेरा म जिला कलेक्टर सुश्री किरण कौशल, एसपी श्री अभिषेक मीणा, जिला पंचायत सीईओ श्री कुंदन कुमार, वन विभाग के अधिकारी संग स्थानीय जनप्रतिनिधि अउर गणमान्य नागरिक उपस्थित रहिन।