लॉक डाउन म तको लइका मन के प्रतिभा खुल के आगू आइस

कोरबा, 13 जनवरी 2021। सरकारी स्कूल के शिक्षक मन ह कोरोना काल म पढ़ई के अकतहा आन गतिविधि करा के ये धारणा ल गलत साबित करके देखाय हें के सरकारी स्कूल पिछड़ा नइ हे। कोरोना के संकट काल म सरकारी शिक्षक लइका मन के पढ़ाई ल लेके चिंतित रहिन। कोरोना काल म शिक्षक मन ह लइका मन के आन प्रतिभा मन ल खुलके आगू लाइन। बाल्को के तीर दोदंरों के प्राथमिक शाला दोंदरो म पदस्थ सहायक शिक्षक ममता चैहान ह कोरोना सर्वे म लगे अपन ड्यूटी के संगेच विद्यालय के लइका मन ल पढ़ई के संगें-संग आन गतिविधि मन म हिस्सा लेहे बर प्रेरित करिन अऊ एखर बर ओ मन ल मार्गदर्शन घलोक दीन। छत्तीसगढ़ शासन के महत्वकांक्षी योजना पढ़ई तुहर दुवार के परयोग उमन अपन लइका मन के प्रतिभा ल बाहिर लाय म करिन। उमन अपन गांव म तीन स्थान म मोहल्ला क्लास चालू करिन जऊन आज तक चलत हे। अपन मोहल्ला क्लास म जऊन लइका साहित्य, कला , ललित कला अऊ सांस्कृतिक क्षेत्र म बने हे ओ मन ल पढ़ाई के संगें-संग ए कला मन ल घलोक सिखाना शुरू करिन। एकर परिणाम ये रहिस के जब आन संस्था मन ऑनलाइन फैंसी ड्रेस, रंगोली, चित्रकला, निबंध आदि प्रतियोगिता ऑनलाइन आयोजित करे गीस। उमन अपन लइका मन ल ए प्रतियोगिता मन म भाग लेहे बर तियार करिन। लइका मन ह ए क्षेत्र मन म अपन सुग्‍घर प्रदर्शन करत बढि़या स्थान प्राप्त करिन।
बालको के वार्ड नंबर 39 के पार्षद लोकेश चैहान कोति ले आयोजित बालको नगर के सबो वासी मन बर फैंसी ड्रेस प्रतियोगिता के आयोजन करे गए रहिस जेमां प्राथमिक शाला दोंदरों के लइका मन ह टॉप 10 म अपन जगा बनाइन। ये कार्यक्रम के मुख्य अतिथि बालको के सीएसआर हेड अवतार सिंह रहिन। कु साधना ह दूसर, ज्योतिका ह चौथा, प्रियांशी ह पांचवां अऊ रिया ह छठवां स्थान प्राप्त करिस। लइका मन ह मेडल के संग शील्ड मोमेंटो घलोक प्राप्त करिन। प्रतिभा होही त साधन के मोहताज नइ होवयं ये बात प्राथमिक शाला दोदंरो के लइका मन ह कोरोना जइसे उलट समय म घलोक साबित करे हें। मारवाड़ी युवा मंच जमनीपाली कोति ले आयोजित रंगोली प्रतियोगिता म घलोक ए लइका मन ह हिस्सा लीन। अतका छोटे से उमर म ए लइका मन के रंगोली देखके मंच के अध्यक्ष मनीष अग्रवाल ह लइका मन अऊ शिक्षिका ल सम्मान स्वरूप मोमेंटो भेंट करिस। अमेरिका के एक संस्था कोति ले आयोजित कुछ प्रतियोगिता मन म दोंदरों के लइका मन ह भाग लेवत हें। उहां ले ओ मन ल भागीदारी के सर्टिफिकेट तको मिले हे। छत्तीसगढ़ शासन के महत्वकांक्षी योजना पढ़ाई तुहर दुवार लइका मन बर आपदा म अवसर साबित होवत हे। कोरबा जिला म ये कार्यक्रम के सफल संचालन जिला शिक्षा अधिकारी सतीश पाण्डेय कोति ले करे जात हे।