- कोरबा जिला म 20 जुलाई ले आज तक साढ़े तीन हजार पशुपालक मन ह 2 लाख 39 हजार किलोग्राम गोबर बेच डरे हें अऊ चार लाख 97 हजार रूपिया कमा डरे हें
कोरबा, 01 अगस्त 2020। गोधन न्याय योजना के तहत खरीदे गए गोबर के राशि संग्राहक मन के बैक खाता म सीधा जमा होही। एखर बर संग्राहक मन के को-ऑपरेटिव बैंक म खाता होना चाही। जानबा हे के संग्राहक मन के खाता खोले बर गोठान समिति मन के सदस्य, कृषि, पशुपालन अऊ पंचायत अउ ग्रामीण विकास विभाग के मैदानी कर्मचारी मदद करत हें। गोठान समिति मन के खाता घलोक कॉ-ऑपरेटिव बैंक म ही खोले जात हे ताकि गोबर ले बने वर्मी कम्पोस्ट के बिक्री ले मिले राशि सीधा गोठन समिति के खाता म जमा करे जा सकय। मुख्यमंत्री श्री भूपेश बघेल के हुकुम के मुताबिक गोबर संग्राहक मन ल खरीदे गए गोबर के पहिली भुगतान पांच अगस्त ले करे जाही।
गोबर बेचे गोठान तक पहुंचत हें अड़बड़ मनखे – राज्य सरकार के गोधन न्याय योजना के गांव वाले मन म भारी उत्साह देखे ल मिलत हे। गोबर जइसे फोकट के चीज के दू रूपिया किलो मे खरीदी करके मूल्यवान खाद बनाके ग्रामीण अर्थव्यवस्था ल मजबूत बनाए के ये योजना ले गौ-पालक मन ल अच्छा फायदा होवत हे। कोरबा जिला म 20 जुलाई ले आज तक साढ़े तीन हजार पशुपालक मन ह 2 लाख 39 हजार किलोग्राम गोबर बेच डरे हें अऊ चार लाख 97 हजार रूपिया कमा डरे हें। गोबर संग्राहक मन ह अब तक जनपद पंचायत कोरबा म 39 हजार 455 किलो, जनपद पंचायत करतला म 12 हजार 840 किलो, जनपद पंचायत कटघोरा म 45 हजार 626 किलो, जनपद पंचायत पाली म 1 लाख 13 हजार 435 किलो अऊ जनपद पंचायत पोड़ीउपरोड़ा म 17 हजार 595 किलो गोबर बेचे हें। जिला पंचायत के मुख्य कार्यपालन अधिकारी श्री कुंदन कुमार ह बताइस के गोधन न्याय योजना ले जिला के पशुपालक मन ल सीधा लाभ होही। सीईओ ह सबो गोठान मन म गोबर खरीदी के बढि़या व्यवस्था ठउका करे के हुकुम अधिकारी मन ल देहे हें।