मुख्यमंत्री ह रखीन स्व. बिसाहूदास महंत स्मृति मेडिकल कॉलेज कोरबा के नेहे

मुख्यमंत्री ह रखीन स्व. बिसाहूदास महंत स्मृति मेडिकल कॉलेज कोरबा के नेहे
रायपुर 29 जुलाई 2023 शनिच्चर। मुख्यमंत्री दाऊ भूपेष बघेल ह आज कोरबा जिला ल एक ठिन बड़े जनिक भेंट देवत स्व. बिसाहूदास महंत स्मृति मेडिकल कॉलेज कोरबा के नवा भवन के नेहे रखीन। मेडिकल कॉलेज के नवा भवन बनाए बर कोरबा जिला के गाँव भुलसीडीह तहसील भैंसमा म 124.24 एकड़ भूइयाँ के आबंटन करे गे हावय। एकर निर्माण बर 325 करोड़ के बजट स्वीकृत करे गे हावय। शासकीय चिकित्सा महाविद्यालय कोरबा के उद्घाटन दिनांक 02 मार्च 2021 के मुख्यमंत्री दाऊ भूपेष बघेल ह द्वारा करे गे रिहिसे। स्थानीय लोगन मन के माँग के अनुसार कोरबा मेडिकल कॉलेज के नामकरण स्व. बिसाहूदास महंत के नाम म रखे गे हावय।
ये महाविद्यालय ल सत्र 2022-23 बर एम.बी.बी.एस के 100 सीट के पहिली मान्यता दिनांक 09 सितम्बर 2022 के मिलीस हावय। अभीन ये महाविद्यालय म 121 छात्र-छात्रा मेडिकल के पढ़ई करत हावय। चिकित्सा महाविद्यालय म 23 ठिन विभाग म लगभग 130 चिकित्सक कार्यरत हावय। स्व. बिसाहू दास महंत स्मृति चिकित्सा महाविद्यालय ले जुरे इंदिरा गाँधी चिकित्सालय कोरबा म 357 बिस्तर के चिकितसालय संचालित हावय जेमे अबड़ अकन जटिल रोग मन के इलाज होवत हावय। एकर पहिली बने इलाज बर बड़का शहर ऊपर निर्भर रहे बर परत रिहिस हावय। फेर अब अबड़ अकन जटिल ले जटिल रोग मन के उपचार मेडिकल कॉलेज कोरबा म होवत हावय।