‘सौर सुजला योजना’ ले आशीष टोप्पो के खेत म छाइस हरियाली, एक एकड़ म लेवत हे तीन-तीन फसल

CHHATTISGARHI NEWS: कोरिया, जिला के ग्राम कदमनारा के रहवइया 46 बछर के किसान आशीष टोप्पो पिता प्रभुदयाल ‘सौर सुजला योजना’ के मदद से अपन एक एकड़ खेत म सालभर व्यवस्थित रूप से खेती करत हवय। पहिली सिंचाई बर पानी के उपलब्धता एक बड़का चुनौती रहिस, फेर सौर सिंचाई सुविधा मिल जाए के बाद खेत म पानी के बेहतर प्रबंधन संभव हो गे हे, जेकर सेती ओ ह वर्तमान म एक एकड़ भूमि म साल भर म लगभग तीन फसल लेवत हवय।
आशीष टोप्पो ह अपन खेत म धान के संगे-संग गेहूँ, सरसों, उड़द अउ मूंगफली जइसे आन-आन फसल के खेती करत हवय। सिंचाई के सुविधा बेहतर होए के सेती ओ ह मौसम अउ खेत के जरूरत के मुताबिक फसल मन के योजना बना पावत हवय। खेती-किसानी के माध्यम ले ओ ल हर साल लगभग एक लाख रुपिया के आमदनी होवत हवय। ओखर कहना हे के सौर सुजला योजना केवल पानी पहुँचाए के साधन नो हे, बल्कि खेती ल अधिक टिकाऊ अउ व्यवस्थित बनाके ओखर भरोसा ल बढ़ाय के साधन ये। ए प्रकार कम भूइंया म घलव बेहतर जल प्रबंधन ले किसान मन अपन आमदनी अउ आजीविका ल सुदृढ़ कर सकत हवंय।