कोरिया: गौठान म मशरूम उत्पादन, कम लागत म जादा फायदा

कोरिया, ग्रामीण अर्थव्यवस्था ल मजबूत बनाए अऊ महिला मन ल आजीविकामूलक गतिविधि मन ले जोड़के सशक्त करे के काम शासन के नरवा, गरुवा, घुरुवा अऊ बाड़ी अऊ गोधन न्याय योजना बखूबी करत हे। ए योजना मन के तहत गौठान मन म कई ठन आजीविका मूलक गतिविधि संचालित होवत हे जेखर से ग्रामीण परिवार ल आय के आसान रद्दा मिले हे जेकर सफलता बयां करत हे कोरिया जिला के विकासखण्ड बैकुण्ठपुर के आनी गौठान के मां शारदा स्व सहायता समूह अऊ सोनहत के घुघरा गौठान के पारो महिला स्व सहायता समूह के दीदी मन। ए समूह के कुछ महिला मन ह आजीविका के रूप म मशरूम उत्पादन काम ल चुनिन, कम समय अऊ लागत ले जादा लाभ मिले ले ये महिला मन लगन ले मशरूम उत्पादन करत हें।
मां शारदा समूह के कुल 10 महिला मन गौठान म ही राष्ट्रीय ग्रामीण आजीविका मिशन बिहान ले जुड़के गौठान म कई प्रकार के काम करत हें अऊ अपन आजीविका के संचालन करत हें। समूह के अध्यक्ष प्रभा के बताती समूह के कुछ महिला मन ह मशरूम उत्पादन के बारे म सोचिन अऊ बिहान ले प्रशिक्षण प्राप्त होए के बाद काम मे जुट गें। 4 हजार के लागत लगाके 3 महिना ले मशरूम उत्पादन के काम करत महिला मन ह अब तक 25 हजार रुपिया के शुध्द लाभ घलोक प्राप्त कर लेहे हें। अइसने पारो स्व सहायता समूह के महिला मन म सचिव उदेश्वरी ह 4 हजार रुपिया ले मशरूम उत्पादन के काम शुरू करे हें। ओ मन बताथें कि पाछू सीजन म ओ मन ल 9 हजार के शुध्द लाभ होए रहिस अऊ अभी हाल म 15 हजार रुपिया तक के लाभ होए के अनुमान हे।