रायपुर, मुख्यमंत्री श्री भूपेश बघेल ह आज चिरमिरी के लालबहादुर शास्त्री स्टेडियम म आयोजित कार्यक्रम म उपस्थित मनखे मन ल संबोधित करत कहिन कि छत्तीसगढ़ के सरकार किसान अऊ गरीब वर्ग अऊ मजदूर मन के हितैषी सरकार हे। ते खातिर किसान मन के बैंक अऊ सिचाई के करजा माफ करके 2500 रुपए प्रति क्विंटल म धान खरीद के किसान मन ल आर्थिक समृद्धि के तरफ ले जाय के काम करे हे।
उमन कहिन कि किसान मन बिल्कुल चिंता झन करव। छत्तीसगढ़ सरकार प्रदेश के सबो किसान मन ले 2500 रुपए प्रति क्विंटल के दर ले धान खरीदही। उमन चिरमिरी म 34 करोड़ 48 लाख रुपए के आवर्धन जल प्रदाय योजना के लोकार्पण संग कुल 103.81 करोड़ रुपए के विकास काम मन के लोकार्पण अऊ शिलान्यास घलोक करिन। ये बेरा म प्रदेश के मुख्यमंत्री ह कोरिया जिला म हवाई सेवा के विस्तार बर हवाईपट्टी बनाए, सोनहत म महाविद्यालय के नामकरण डॉ रामचंद्र सिंहदेव के नाम म करे अऊ जिला म पर्यटन ल बढ़ावा देहे एडवेंचर पार्क बनाए के संग उप-तहसील केल्हारी अऊ पटना ल पूर्ण तहसील बनाए के घोषणा घलोक करिन।