जिला प्रशासन जी-जान ले जुटे हे के जिला म लॉकडाउन के बेरा म फंसे मनखे मन ल घर जइसे सुविधा मुहैया कराए बर

कोरिया 15 अप्रैल 2020। लॉकडाउन बेरा म देश के कई राज्य अउ प्रदेश के आन जिला मन के श्रमिक अउ नागरिक मन कोरिया जिला म फंसे हें। कोरोना वायरस के संक्रमण ले उपजे ये संकट के स्थिति म सबो मनखे मन ल मूलभूत आवश्यकता उपलब्‍ध कराए बर कलेक्टर श्री डोमन सिंह के मार्गदर्शन म जिला प्रशासन कोति ले समुचित उपाय करे जात हे। जिला के विकासखंड बैकुण्ठपुर, मनेन्द्रगढ़, खड़गवां अउ भरतपुर म राहत शिविर बनाये गए हे। जिहां सबो मनखे मन ल घर जइसे सुविधा मुहैया कराए बर पूरा जिला प्रशासन जी-जान ले जुटे हे। भोजन अउ रहे के व्यवस्था के संगेच बेरा-बेरा म मेडिकल टीम कोति ले स्वास्थ्य परीक्षण घलोक करे जात हे। राहत शिविर मन म नियमित रूप ले साफ-सफाई, सैनीटाईजेशन, मास्क पहिरे अउ सोशल डिस्टेंसिंग के घलोक कड़ाई ले पालन सुनिश्चित करे जात हे।