फूड प्रोसेसिंग के दिशा म मजबूती ले कदम आगू बढ़ावत हें महिला मन, समूह करत हे खाद्य तेल, पंचरत्न आटा, मसाला आदि के निर्माण अऊ पैकेजिंग

कोरिया, कोरिया जिला के बैकुंठपुर विकासखंड के ग्राम सलका स्थित गौठान म स्वसहायता समूह के महिला मन खाद्य प्रसंस्करण के क्षेत्र म अपन कदम मजबूती ले बढ़ावत हें। शासन के मंशा के मुताबिक स्वसहायता समूह के महिला मन ल अपन गांव म ही आजीविका संवर्धन के साधन मिले हे। गौठान सलका म स्व सहायता समूह के महिला मन खाद्य प्रसंस्करण के अंतर्गत सरसों, तिल अऊ मूंगफली के तेल प्रसंस्करण, पंचरत्न आटा, कई प्रकार के मसाला निर्माण के संगेच साबुन अऊ अगरबत्ती के निर्माण काम घलोक करत हें। गौठान म महिला समूह ह मशरूम उत्पादन घलोक करत हें।
विकासखण्ड बैकुण्ठपुर के ग्राम सलका गौठान म कृष्णा महिला स्व सहायता समूह के 10 महिला मन ह खाद्य तेल के प्रसंस्करण के काम शुरू करे हें।समूह के अध्यक्ष राजकुमारी ह बताइस कि महिला मन ल राज्य ग्रामीण आजीविका मिशन बिहान के सहयोग ले खाद्य तेल निर्माण के प्रशिक्षण दे गीस। वो ह बताइस कि जिला प्रशासन कोति ले तेलघानी मशीन दे गीस, उत्पादन बर सरसों बीज स्थानीय बाजार ले खरीदे जात हे। मशीन ले सरसों बीज ले तेल पेरे जात हे, एकर बाद तेल ल छान के पैकिंग कर बेचे बर तियार करे गए हे। राजकुमारी ह बताइस कि प्रशिक्षण के बाद मात्र 2 दिन म ही समूह ह 11 लीटर तेल बनाए हे। संगेच तिल अऊ मूंगफली तेल प्रसंस्करण के काम घलोक लगातार जारी हे। निर्मित तेल ल सीमार्ट व स्थानीय बाजार म विक्रय बर रखे जाही, महिला मन तेल के ब्रांडिंग अउ आन मार्केटिंग के योजना घलोक बनावत हें।
अइसनहे गौठान म सखी महिला समूह ह मिनी राइस मिल के संचालन करत हे। जेखर से चावल, गेंहू अऊ पंचरत्न आटा, मिर्च पाउडर, गरम मसाला आदि तियार करत हे। गणेश महिला समूह ह साबुन निर्माण काम करत हे। जेखर से समूह के महिला मन अब तक 25 हज़ार ले जादा के कमाई होए हे। कृष्णा समूह के ही महिला मन अगरबत्ती निर्माण के काम घलोक गौठान म करत हें। इंद्रा महिला स्वसहायता समूह के महिला मन मशरूम उत्पादन के आजीविका ले जुड़कर सफलता बर आगू बढ़त हें।