कोरिया जिला के 21 एकड़ बंजर भूइँया म छागे हरियाली
मुख्यमंत्री वृक्षारोपण योजना के तहत 43 किसम के 10 हजार पौधा ले बंजर भूइँया वन प्रदर्शन क्षेत्र म बदलगे
एक बछर पहिली गृहमंत्री रोपे रिहिस पहला बिरवा, आज आक्सीजोन के रूप म लेवत हे अकार
रइपुर, 12 जून 2022
छत्तीसगढ़ के मुख्यमंत्री दाऊ भूपेश बघेल के मन मुताबिक प्रदेश म मुख्यमंत्री वृक्षारोपण योजना के तहत सरलग बूता होवत हे। ये योजना ले बंजर भूमि जिहां दूबी तको नइ राहत रिहिस उहां तको औषधीय महत्व के हजारों पौधा नजर आए लगे हे। अइसेनेहे कोरिया जिला मुख्यालय बैकुण्ठपुर के राष्ट्रीय राजमार्ग 43 तीरन ग्राम पंचायत आनी म 21 एकड़ बंजर भूँइया ल मुख्यमंत्री वृक्षारोपण योजना बर चुने गे हे। जिला के प्रभारी मंत्री श्री ताम्रध्वज साहू द्वारा 4 जुलाई 2021 के इहां पहला बिरवा लगाके बंजर भूइँया म पौधारोपण के शुरूआत करे गे रिहिस।
एकदमे बंजर परे ये भूइँया म घास के एक तिनका तको नइ होवत रिहिस उहां अब औषधीय महत्व के हजारों पौधा मन के संग मिश्रित वन म होवइया जम्मो किसम के पौधा मन के हरियाली ये क्षेत्र आक्सीजोन के रूप म आकार लेवत हावय। फलदार पौधा मन के बगइचा के संगे संग इमारती अउ शोभनीय पौधा मन के बगरे वन क्षेत्र तियार करे गे हे। इहां 20 हजार ले जादा औषधीय महत्व के पौधा मन के रोपण अंतवर्तीय तरीका ले करे गे हवय।
मुख्यमंत्री वृक्षारोपण योजना के बने क्रियान्वयन होवय एकर बर जिला म एक ठो मानक प्रदर्शन प्रक्षेत्र अउ मातृवाटिका (नर्सरी) बनाए हे। मनरेगा, जिला खनिज न्यास मद संग आने विभागीय योजना मन के अभिसरण ले ग्राम पंचायत आनी के एक बड़े जनिक क्षेत्रफल ल वन प्रदर्शन प्रक्षेत्र के स्वरूप दे गे हे। येमा पशु मन के आश्रय स्थल के संगे संग चरागन विकास तको करे गे हे जेकर बर 5 एकड़ भइँया आरक्षित हे। इहां 10 एकड़ म फलोद्यान तको तियार करे जावत हे। क्षेत्र के कृषि वैज्ञानिक मन के मुताबिक ये मातृवाटिका ले अवइया हरेक बछर म लगभग 1 लाख औषधीय पौधा मिल सकही अउ येह आय के तको बड़का स्रोत बनके उभरही।
कोरिया जिला कलेक्टर श्री कुलदीप शर्मा के अनुसार छत्तीसगढ़ म येह अलग किसम के उदीम हरे जेकर ले जिला ल एक नवा पहिचान मिलही। ये मातृवाटिका म कोरिया जिला के जंगल म मिलइया कुल 43 आने-आने किसम के लगभग 10 हजार पौधा रोपे गे हे। जेकर विस्तार अंउ रखरखाव के बूता वन विभाग, कृषि विज्ञान केंद्र अउ उद्यान विभाग के जिम्मे हवय।
कोरिया जिला के 21 एकड़ बंजर भूइँया म छागे हरियाली
