कोरिया: गांव मन म सफई के जिम्मा उठाइन समूह के महिला मन

कोरिया, जिला के गांव मन म स्वच्छ भारत मिशन ग्रामीण के तहत स्वच्छता दीदी मन के माध्यम ले मॉडल ग्राम पंचायत मन म कचरा सकेले के काम करे जात हे। एखर से गांव म साफ-सफाई के एक अलगेच माहौल बनत हे, उहें दुसर कोति कचरा सकेले के काम चालू होए ले गांव के महिला मन ल घलोक एक अलग प्रकार के काम स्वरोजगार के रूप म मिले लगे हे। शासन-प्रशासन के सहयोग ले नित नवा आयाम गढत महिला मन के एक अइसनहेच कहानी जिला के विकासखंड बैकुण्ठपुर अंतर्गत मॉडल ग्राम पंचायत पटना म देखे ल मिलीस।
गांव के ओम साई स्व सहायता समूह के 8 महिला मन ह गांव ल स्वच्छ सुंदर बनाए के बीड़ा उठाए हें। स्वच्छ भारत मिशन ग्रामीण के तहत ये महिला मन स्वच्छता दीदी मन के रूप म बिहनिया-बिहनिया घर-घर जाके कचरा सकेले के काम करत हें। कचरा सकेले के संग दीदी मन गांव ल स्वच्छ बनाए म मनखे मन ल सहयोग अऊ कचरा निपटान के संबंध म जागरुक करे के काम घलोक निष्ठा के संग करत हें। समूह के दीदी मन ह बताइन कि ओ मन कचरा सकेल के सेरिग्रेशन शेड म गांजथें, इहां सूखा अउर गीला कचरा ल अलग करके ओखर निस्तारण करे जाथे। ओ मन बताथें कि ये काम ह ओ मन ल अलग पहिचान देवाए हे, जब मनखे ओ मन ल स्वच्छता दीदी कहि के बलाथें, त बहुत अच्छा लागथे। कचरा सकेले के काम ह ऊंखर गांव ल स्वच्छ बनाए के संगेच ओ मन ल रोजगार के अच्छा माध्यम घलोक देहे हे, काम शुरू करे ले अब तक ओ मन ल करीबन 7 हजार रूपिया तक के लाभ घलोक प्राप्त होय हे।