युवा मन म उदीम करे के लगावव लगन: शिक्षण संस्‍था मन ल कहिन मुख्यमंत्री श्री भूपेश बघेल

रायपुर, 23 जनवरी, 2021। मुख्यमंत्री श्री भूपेश बघेल ह आज नेताजी सुभाषचन्द्र बोस के 125वां जयंती के अवसर म इंदिरा गांधी कृषि विश्वविद्यालय के बायोटेक इन्क्यूबेशन सेन्टर अऊ एग्री-बिजनेस इंक्यूबेशन अऊ उत्पादन केन्द्र के शुभारंभ करिन। मुख्यमंत्री ह इन्क्यूबेशन सेंटर के नामकरण महान स्वतंत्रता संग्राम सेनानी नेताजी सुभाषचंद्र बोस के नाम म करे के घोषणा करिन। मुख्यमंत्री निवास कार्यालय म आयोजित ये ऑनलाईन कार्यक्रम म श्री बघेल ह 30 करोड़ रूपिया लागत ले बनत बायोटेक इन्क्यूबेशन सेन्टर भवन के शिलान्यास करिन अऊ 2 करोड़ रूपिया के लागत ले नवनिर्मित एग्री-बिजनेस इंक्यूबेशन अऊ उत्पादन केन्द्र के शुभारंभ करिन। मुख्यमंत्री ह ये बेरा म राज्य योजना आयोग के कुरिया मन के नामकरण तको करिन, आइडिया कैफे के लोकार्पण घलोक करिन। मुख्यमंत्री ह राज्य योजना आयोग के कार्यालय म बनाय गए ब्रेन स्टारमिंग सेंटर के नामकरण नेताजी सुभाषचंद्र बोस के नाम म, लाइब्रेरी के नामकरण संविधान बनइया डॉ.भीमराव अम्बेडकर के नाम म, 30 मनखे के क्षमता वाले सभागार के नामकरण देश के पहिली प्रधानमंत्री पं. जवाहर लाल नेहरू के नाम म अऊ 80 मनखे के क्षमता वाले सभागार के नामकरण राष्ट्रपिता महात्मा गांधी के नाम म करे के घोषणा करिन।
मुख्यमंत्री ह ये बेरा म प्रदेश के सबो विश्वविद्यालय मन म इन्क्यूबेशन अऊ उत्पादन केन्द्र चालू करे के आव्हान करत कहिन कि गढ़बो नवा छत्तीसगढ़ अभियान म उत्पादक युवा मन के महत्वपूर्ण भूमिका होही। सबो शैक्षणिक संस्था मन युवा मन म उद्यमशीलता के विकास करे के दिशा म काम करयं। इन्क्यूबेशन सेंटर म युवा मन ल अनुसंधान अऊ शोध बर प्रयोगशाला के सुविधा, तकनीकी मार्गदर्शन, बिजनेस नेटवर्किंग बर मार्गदर्शन, वित्तीय अऊ ऋण सहायता के सुविधा उपलब्‍ध कराए जाही।
कार्यक्रम के अध्यक्षता योजना, आर्थिक अऊ सांख्यिकी मंत्री श्री अमरजीत भगत ह करिन। मुख्यमंत्री के सलाहकार सर्वश्री प्रदीप शर्मा, श्री विनोद वर्मा, श्री रुचिर गर्ग अऊ श्री राजेश तिवारी, राज्य योजना आयोग के उपाध्यक्ष श्री अजय सिंह, पुलिस महानिदेशक श्री डी.एम.अवस्थी, कृषि उत्पादन आयुक्त अऊ सचिव डॉ. एम.गीता, इंदिरा गांधी कृषि विश्वविद्यालय के कुलपति डॉ. एस. के.पाटिल घलोक उपस्थित रहिन।