‘विष्णु’ के घर कृष्ण जन्माष्टमी के धूम, मुख्यमंत्री ह दिव्यांग लइका मन संग मनाइन तिहार

रायपुर, 26 अगस्त 2024. कृष्ण जन्माष्टमी के मौका म आज भगवान श्रीकृष्ण के जन्मोत्सव मुख्यमंत्री निवास म धूमधाम ले मनाए गीस। मुख्यमंत्री श्री विष्णु देव साय ह ए पइत जन्माष्टमी अपन निवास म दिव्यांग लइका मन के संग मनाईन। राधा अऊ कृष्ण के रूप धरे रायपुर के तीन दिव्यांग संस्था मन के 25 लइका मन के अठखेलि ले आज संझा मुख्यमंत्री निवास गुलजार रहिस। मुख्यमंत्री श्री साय ह ए लइका मन के संग भगवान श्रीकृष्ण के पूजा-अर्चना करिन अऊ प्रदेश के सुख-समृद्धि अऊ खुशहाली के कामना करिन। उमन पालना म बाल गोपाल के रूप म बिराजे दिव्यांग बालक रूद्र के पूजा करके झूला घलोक झुलाइन। उमन प्रदेशवासी मन ल कृष्ण जन्माष्टमी के बधाई अऊ शुभकामना दीन।

मुख्यमंत्री श्री विष्णु देव साय ह पूजा के बाद सबो लइका मन ल खुद अपन हाथ ले प्रसाद बाटिन। उमन लइका मन ल अपन कोरा म लेके दुलारिन अऊ बातकरके उंखर पढ़ाई-लिखाई के बारे म घलोक पूछिन। रायपुर के शासकीय दृष्टि अउ श्रवण बाधितार्थ विद्यालय मठपुरैना अउर माना के अस्थिबाधित बालगृह अऊ बहु-दिव्यांग बालगृह के लइका मुख्यमंत्री निवास म आयोजित कृष्ण जन्माष्टी कार्यक्रम म सामिल होइन। संवेदनशील मुख्यमंत्री श्री साय ह आज के पावन दिन ए लइका मन के संग साझाकरके ऊंखर त्यौहार ल खास बना दीन। उमन ए मौका म कहिन कि ए लइका मन के संग भगवान श्रीकृष्ण के जन्मोत्सव मनाना अऊ उंखर पूजा करना मोर बर बहुत सुखद अऊ गर्व के विसय हे। प्रदेश के आन लइका मन के जइसे ये लइका मन घलोक हमार समाज के अभिन्न हिस्सा हे। हम इंकर बेहतर परवरिश, शिक्षा-दीक्षा अऊ ओ मन ल आत्मनिर्भर बनाए बर सदैव प्रतिबद्ध हन मने बांना उंचाए हन।