मुख्यमंत्री ह पुरस्कार ल प्रदेश के अन्नदाता किसान मन के नाम करिस समर्पित
रायपुर, मुख्यमंत्री श्री भूपेश बघेल ले काली संझा ऊंखर निवास कार्यालय म कृषि मंत्री श्री रविन्द्र चौबे ह मुलाकात कर के छत्तीसगढ़ ल मिले कृषि कर्मण पुरस्कार ल सौंपिस। ये बेरा म प्रदेश के दू प्रगतिशील किसान श्री वीरेन्द्र कुमार साहू अऊ श्रीमती अदिती कश्यप घलोक संग म रहिन । मुख्यमंत्री ह कृषि मंत्री अऊ दुनों किसान मन ल पुरस्कार बर अपन बधाई अऊ शुभकामना दीन। श्री बघेल ह छत्तीसगढ़ ल मिले कृषि कर्मण पुरस्कार बर खुशी जताईन अऊ पुरस्कार ल प्रदेश के अन्नदाता किसान मन के नाम समर्पित करिन। छत्तीसगढ़ ल कृषि कर्मण पुरस्कार के रूप म पांच करोड़ रूपिया के राशि, ट्रॉफी अऊ प्रशस्ति पत्र ले पुरस्कृत करे गए हे।
हम आप ला बता देवन कि छत्तीसगढ़ ल सबले जादा अन उत्पादन बर प्रधानमंत्री श्री नरेन्द्र मोदी ह 2 जनवरी के कर्नाटक के तुमकुर म कृषि कर्मण पुरस्कार ले सम्मानित करिस। कृषि मंत्री श्री रवीन्द्र चौबे ह राज्य के तरफ ले ये पुरस्कार झोंकिस। छत्तीसगढ़ ल साल 2016-17 म कुल खाद्यान्न उत्पादन श्रेणी-2 के अंतर्गत सबले जादा अन उत्पादन बर भारत सरकार कोति ले ये पुरस्कार बर चुने गए रहिस हे। कर्नाटक म आयोजित पुरस्कार समारोह म प्रधानमंत्री ह प्रदेश के दू प्रगतिशील किसान मन धमतरी जिला के अंतर्गत ग्राम बेलौरी के श्री वीरेन्द्र कुमार साहू अऊ विकासखण्ड कवर्धा के अंतर्गत ग्राम पालीगुड़ा के श्रीमती अदिती कश्यप ल घलोक पुरस्कृत करिस। पुरस्कार के तौर म ओ मन ल दू-दी लाख रूपिया के राशि अऊ प्रशस्ति पत्र प्रदान करे गीस। ये बेरा म कृषि मंत्री के संग संचालक कृषि श्री टामन सिंह सोनवानी अऊ आन विभागीय अधिकारी उपस्थित रहिन।
