क्षितिज शेट्ठी बनिस ऊर्जा आत्मनिर्भर : पीएम सुरुज घर-मुफ्त बिजली योजना ले बिजली बिल होइस शून्य

रायपुर, सुरुज के प्रकाश हमार जीवन म ऊर्जा, प्रकाश अऊ स्वास्थ्य के संचार करथे। ये प्राकृतिक शक्ति हमार जीवन विकास के संगें-संग अब घर मन ल मुफ्त बिजली घलोक देवत हे। अइसन संभव हो पाए हे पीएम सुरुज घर मुफ्त बिजली योजना ले, ऊर्जा आत्मनिर्भरता के दिशा म श्री क्षितिज शेट्ठी अम्बिकापुर के रहवइया एक प्रेरणादायक उदाहरण हे। वो ह प्रधानमंत्री सुरुज घर मुफ्त बिजली योजना के लाभ लेके अपन घर के छत म 5 किलोवाट क्षमता के सोलर रूफटॉप प्लांट लगवाए हे। ए पहल के बाद ओ अब सिरिफ उपभोक्ता नइ रहि गए हे, बल्कि ऊर्जा आत्मनिर्भर बन गे हे।
श्री शेट्ठी बतात हे के सोलर प्लांट लगाय के बाद ले ओ ल अब बिजली बिल जमा नइ करना परत हे। वोखर सौर ऊर्जा उत्पादन क्षमता घरेलू खपत ले जादा हे, जेखर से अकतहा बिजली ग्रिड म जमा होवत हे। वो ह बताइस के पहिली हर महीना दू ले ढाई हजार रूपिया तक के बिजली बिल आवत रहिस, फेर अब बिल शून्य हे। अब मैं अपन बिजली खुद बनात हंव अऊ पर्यावरण संरक्षण म योगदान घलोक देवत हंव, ए योजना ले वोला आर्थिक लाभ होवत हे संगेच प्राकृतिक संसाधन मन के बचत अऊ पर्यावरण प्रदूषण ल कम करे म घलोक मदद मिलत हे। श्री क्षितिज शेट्ठी ह फरवरी महिना म सोलर रूफटॉप प्लांट लगवाए रहिस। ओ समय ओ ल केंद्र सरकार ले 78 हजार के सब्सिडी मिले रहिस। अब राज्य सरकार घलोक अलग-अलग क्षमता के मुताबिक अकतहा सब्सिडी देवत हे, जेखर से ये योजना आम नागरिक मन खातिर अऊ जादा लाभकारी बन गए हे।
वो ह बताइस के सोलर पैनल के लागत तीन ले चार साल म पूरा वसूल हो जाथे, जबकि कंपनी 20 साल तक के वारंटी देवत हे। ए प्रकार अवइया बछर म ओ बिना कोनो अकतहा खरचा के मुफ्त बिजली के लाभ उठाही। वो ह मनखे मन ले अपील करत कहिस के सरकार जब सब्सिडी देवत हे, त हर नागरिक ल एकर लाभ अवश्य उठाना चाही। एखर से बिजली खरच बचही अऊ पर्यावरण संरक्षण म हम सबो सहभागी बनबोन।
प्रधानमंत्री सुरुज घर-मुफ्त बिजली योजना के उद्देश्य हर घर ल ऊर्जा आत्मनिर्भर बनाना अऊ स्वच्छ ऊर्जा ल बढ़ावा देना हे। श्री क्षितिज शेट्ठी के ये कदम ए दिशा म एक जीवंत उदाहरण हे, जे ह ये साबित करे हे के जब आम नागरिक ऊर्जा आत्मनिर्भरता कोति आगू बढ़त हे, त पूरा समाज सौर ऊर्जा क्रांति कोति कदम बढ़ात हे।