सरकार पीड़ित परिवार के संग, करे जाही हरसंभव मदद-केदार कश्यप
कवर्धा, २१ मई २०२४/ कवर्धा म कुकदूर थाना क्षेत्र म घटित सड़क दुर्घटना ह पूरा देश ल झकझोर देहे हे। आज छत्तीसगढ़ के वनमंत्री केदार कश्यप ग्राम सेमरहा पहुँचके पीड़ित परिवार मन ले भेंट करिन। केदार कश्यप ह सड़क दुर्घटना ल लेके कहिन के ये बहुतेच हृदय विदारक घटना हे अऊ निश्चित तौर म जेन क्षति होए हे। ओ क्षति ल कोनो पूरा नइ कर सकय। उमन कहिन कि इहां सबो हमार आदिवासी समाज के भाई बहिनी यें। हम इहां मंत्री होए के नाते न ही भलुक सामाजिक होए के नाते हम उपस्थित होए न। इहां हमार समाज के सबो मनखे उपस्थित हे अऊ हमार इहां के विधायक जी घलोक इहां म उपस्थित हें।
मंत्री केदार कश्यप ह कहिन कि हमार मुख्यमंत्री विष्णुदेव साय जी ह घलोक संवेदना प्रकट करे हें। प्रधानमंत्री जी राष्ट्रपति जी ह घलोक गहरी संवेदना प्रकट करे हें। उमन कहिन हमर कोसिस रइही के सरकार के जतना योजना हे वो योजना मन के लाभ इमन ल देहे जाय अऊ ऊंखर परवार के आर्थिक दृष्टि ले मदद करे जाय। लइका मन के लालन पालन के दृष्टि ले, ऊंखर शिक्षा-दीक्षा ल लेके सरकार के तरफ ले हर संभव सहायता करे जाही।
