कुनकुरी के छठ घाट म जल संरक्षण बर करे गीस श्रमदान

Surabhi Tiwari

जशपुरनगर, जिला म जलस्तर बढ़ाये बर जलसोत नदिया, नरवा, तरिया, नहर अऊ कुंवा मन के सफई बर कलेक्टर नीलेशकुमार महादेव क्षीरसागर के एके अवाज म सरलग कई ठन जगा मन म जल सोत ल बढ़ाए बर कई परकार के काम करे जात हे। इही कड़ी म आज 2 जून के दिन कुनकुरी के छठ घाट के साफ-सफाई घलोक करे गीस। जेमां कलेक्टर संग कुनकुरी विधायक यूडी मिंज ह घलोक भिनसरहा 6 बजे ले 10 बजे तक कुनकुरी डेम (छठ घाट) के साफ सफाई म भाग लीस अऊ करीबन 4 घंटा तक ए अभियान म हाथ बटाइन।

जशपुर जिला म जलसंरक्षण बर विशेष अभियान जिला प्रशासन कोति ले चलाये जात हे। ये मां कुनकुरी विधायक यूडी मिंज ह घलोक विशेष रुचि देखाए हें एखर ले पहिली जशपुर के सती तालाब के साफ-सफाई अउ गहरीकरण काम के शुरूआत 17 मई ल करे गए रहिस। जेमां कुनकुरी विधायक घलोक इहां पहुँच के सती तालाब के सफई अउ गहरीकरण के काम म अपन हाथ बटाये रहिन। जशपुर कलेक्टर श्री निलेशकुमार महादेव क्षीरसागर के जलसंरक्षण के अभियान ल आगू बढ़ात जलसंवर्धन के ए काम ल जन पहल ले जोड़के कुनकुरी म डैम अऊ छठघाट के सफाई बर कुनकुरी के सबो गणमान्य नागरिक, युवा, अधिकारी मन अउ कर्मचारी मन ले जलसंवर्धन, जलस्तर बढ़ाय के संग सुंदर बनाए म सहयोग के अपील करिन। कुनकुरी विधायक के ए अपील म नगर के मनखे मन ह बढ़-चढ़ के उछाह से हिस्सा लीन अऊ जलस्त्रोत के साफ-सफाई म भिनसरहा ले सैकड़ों के संख्या म नगरवासी हाथ म रांपा अउ सफाई बर उपकरण लेके डेम म उतर के ओखर सफाई म जुट गें।

एखर अवसर म विधायक यू ड़ी मिंज अउ कलेक्टर श्री निलेशकुमार महादेव क्षीरसागर ह डेम के जीर्णोद्धार संग सौंदर्यीकरण के योजना बनाए बर चर्चा घलोक करिन। ओ अभियान के समय जल संसाधन विभाग के लापरवाही ले विधायक संग नगरवासी अड़बड़ नाराज घलोक दिखिन, विधायक श्री मिंज ह विभाग के एसडीओ ल व्यवस्था ठीक करे के बात कहिन।


लउछरहा..