जांजगीर, 19 फरवरी 2024। छत्तीसगढ़ शासन के उघानिकी विभाग के योजना के लाभ लेके जांजगीर चांपा जिला के किसान उन्नत खेती कोति आगू बढ़त हें। पामगढ़ विकास खंड के बारगांव के किसान कुंवर सिंह मधुकर ह ग्राफ्टेड बैंगन अऊ टमाटर के खेती ले लगभग हर एक साल 25 लाख रूपिया के शुद्ध मुनाफा कमावत हे। वोकर बताती वो ह 6 एकड़ म बैंगन के खेती करथे। एक एकड़ म खीरा के खेती ले घलोक ओ ल दू लाख के अकतहा मुनाफा हो जाथे। वो ह उघानिकी विभाग के राष्ट्रीय कृषि विकास योजना ले जुड़े हे तब ले वोखर जीवन म बदलाव आना शुरू हो गए हे, आज पूरा प्रदेश म ओखर नाम प्रगतिशील किसान के रूप म जाने जात हे। वो ह खुशी जाहिर करत मुख्यमंत्री श्री विष्णु देव साय ल धन्यवाद देहे हे। किसान कुंवर सिंह मधुकर ल मुख्यमंत्री श्री विष्णु देव साय ह छत्तीसगढ़ युवा प्रगतिशील किसान के रूप म सम्मानित करे हे। एखरे ओ ल इंडियन काउंसिल ऑफ एग्रीकल्चर रिसर्च के माध्यम ले लखपति कृषक बने म तको सम्मानित करे गए हे।
कुंवर ह कहिस कि बाजार म 12 महीना भांटा-पताल के हमेशा मांग बने रहिथे। बाजार ले हाथों-हाथ साग बेंचा जाथे। मैं ह आन किसान मन ल घलोक बने फसल लेहे बर प्रोत्साहित करत रहिथौं। कभू सपना म घलोक नइ सोचे रहेन कि मैं एक दिन उन्नतशील किसान के श्रेणी म आ जाहूं। उद्यानिकी विभाग ले मिले तकनीकी सहायता अऊ मार्गदर्शन ह मोर खेती करे के विधि ल बहुतेच आसान बना दीस। मधुकर के बताती अनुदान मिले ले वो ह खेत मन म ग्राफ्टेड बैंगन, टमाटर लगाए हे। बैंगन अऊ टमाटर के मांग आन राज्य मन म घलोक हे।
उद्यानिकी विभाग के सहायक संचालक ह बताइस कि उद्यानिकी के एक तकनीक हे जेमां एक पौधा के रूट स्टॉक दूसर पौधा के शॉट स्टेम ले जोड़े जाथे जेखर से दुनों के वाहिका ऊतक आपस म मिल जाथे। ए प्रकार ले ए विधि ले पौधा तैयार करे जाथे। एखर बर शासन ले किसान कंवर सिंह मधुकर ल प्रधानमंत्री सूक्ष्म सिंचाई योजना अंतर्गत 55 प्रतिशत अनुदान 10 एकड़ म दे गीस। उहें रा.कृ.वि.यो. घटक ग्राफ्टेड बैगन उत्पादन बर 0.400 हे. म 30,000 रूपिया अऊ शेड नेट हाउस बनाए बर 14.20 लाख दे गीस, जेमां वो खीरा लगाए रहिस, अभी वो ह हाल म टमाटर लगाही।
किसान कुंवर सिंह ह भांटा-पताल के खेती ले साल म 25 लाख रूपिया के शुद्ध मुनाफा कमाथे
