कुतुल ले नीलांगुर महाराष्ट्र बॉर्डर तक एनएच-130-डी के होही निर्माण
नक्सल प्रभावित क्षेत्र मन म विकास के गति तेज करे खातिर सरकार सरलग करत हे उदीम – मुख्यमंत्री श्री साय
नारायणपुर, बस्तर अंचल ल महाराष्ट्र ले जोड़इया राष्ट्रीय राजमार्ग 130-डी के निर्माण ल नवा गति मिले हे। छत्तीसगढ़ शासन ह कुतुल ले नीलांगुर (महाराष्ट्र सीमा) तक 21.5 किलोमीटर हिस्सा के निर्माण खातिर टेंडर प्रक्रिया पूरा कर लेहे हे। ए सड़क के निर्माण खातिर सबले कम टेंडर देवइया ठेकेदार ले अनुबंध के प्रक्रिया शर्त मन के संग पूरा करे के निर्देश लोक निर्माण विभाग मंत्रालय कोति ले प्रमुख अभियंता, राष्ट्रीय राजमार्ग परिक्षेत्र रायपुर ल देहे गे हे। कुल तीन खंड म बनइया 21.5 किलोमीटर सड़क के निर्माण बर लगभग 152 करोड़ रुपिया टेंडर दर प्राप्त होए हे, जेन ल छत्तीसगढ़ शासन ह मंजूरी देहे हे।
हम आप ल बता देवन के कुतुल, नारायणपुर जिला के अबूझमाड़ क्षेत्र म स्थित हे अऊ कुतुल ले महाराष्ट्र सीमा म स्थित नीलांगुर के दूरी 21.5 किलोमीटर हे। ये नेशनल हाईवे 130-डी के हिस्सा हे। ए सड़क के निर्माण टू-लेन पेव्ड शोल्डर संग करे जाही।
जानबा हे के एनएच-130डी राष्ट्रीय राजमार्ग हे, जेकर कुल लंबाई लगभग 195 किलोमीटर हे। ये एनएच-30 के शाखा मार्ग (स्पर रूट) हे। ये कोण्डागांव ले शुरू होके नारायणपुर, कुतुल होत नीलांगुर (महाराष्ट्र सीमा) तक जाथे। आगू महाराष्ट्र म ये बिंगुंडा, लहरे, धोदराज, भमरगढ़, हेमा, लकासा होत आलापल्ली तक पहुँचथे, जेमां ये एनएच-353डी ले जुड़ जाथे। ए मार्ग के विकसित होए ले बस्तर क्षेत्र सीधा राष्ट्रीय राजमार्ग नेटवर्क ले जुड़ जाही अऊ व्यापार, पर्यटन अऊ सुरक्षा ल बड़का मजबूती प्राप्त होही।
नेशनल हाईवे 130-डी के कोण्डागांव ले नारायणपुर तक के लगभग 50 किमी हिस्सा निर्माणाधीन हे। नारायणपुर ले कुतुल के दूरी 50 किमी हे अऊ उहाँ ले महाराष्ट्र सीमा स्थित नीलांगुर तक 21.5 किमी के दूरी हे। ए राष्ट्रीय राजमार्ग के कुल लंबाई 195 किमी हे, जेमां ले लगभग 122 किमी के हिस्सा कोण्डागांव-नारायणपुर ले कुतुल होत नीलांगुर तक छत्तीसगढ़ राज्य म आथे। ए सड़क के बन जाय ले बस्तर अंचल ल महाराष्ट्र ले सीधा अऊ मजबूत सड़क संपर्क मिलही अऊ नक्सल प्रभावित क्षेत्र मन म सुरक्षित अऊ सुगम यातायात सुविधा सुलभ हो सकही।
प्रधानमंत्री श्री नरेंद्र मोदी जी के सहयोग ले ए नेशनल हाईवे के अबूझमाड़ इलाका म स्थित हिस्सा खातिर फॉरेस्ट क्लियरेंस अऊ निर्माण के अनुमति प्राप्त होए हे, जेखर से ए महत्वाकांक्षी परियोजना के निर्माण के रद्दा खुल गए हे। राष्ट्रीय राजमार्ग 130-डी बस्तर अंचल के प्रगति के मार्ग हे। हमर सरकार ह ए परियोजना ल तेजी देहे खातिर सरलग प्रयास करे हे। ए सड़क ले बस्तर के मनखे मन ल सीधा लाभ मिलही। ये सड़क छत्तीसगढ़ अऊ महाराष्ट्र ल जोड़ही, संगें-संग बस्तर अंचल के सामाजिक अऊ आर्थिक विकास म घलोक अहम भूमिका निभाही। नक्सल प्रभावित क्षेत्र मन म विकास के गति तेज करे खातिर ये परियोजना मील के पत्थर साबित होही।
– मुख्यमंत्री श्री विष्णुदेव साय
