- मुख्यमंत्री के हुकुम म रायगढ़ कलेक्टर-एसपी अस्पताल म भर्ती मजदूर मन ले मिले पचिन
- 03 मजदूर ल बेहतर इलाज बर रायपुर ले जाय के करवाए गीस व्यवस्था
रायपुर, 07 मई 2020/ मुख्यमंत्री श्री भूपेश बघेल के हुकुम म रायगढ़ कलेक्टर श्री यशवंत कुमार आज पुलिस अधीक्षक श्री संतोष सिंग के संग रायगढ़ जिला के तेतला स्थित शक्ति पेपर मिल म हानिकारक गैस के संपर्क म आके बीमार होए मजदूर मन ले मिले संजीवनी अस्पताल पहुंचिन। उहां उमन चिकित्सक मन ले भर्ती मजदूर मन के हाल जानिन। कलेक्टर श्री यशवंत कुमार ह मजदूर मन के परिजन मन अउ अस्पताल प्रबंधन ले चर्चा करके तीन झन ल बेहतर इलाज बर रायपुर रेफेर करे के व्यवस्था करवाए गीस। कलेक्टर श्री यशवंत कुमार ह मिल संचालक ल स्पष्ट निर्देश देहे हें के व्यक्तिगत रूप ले घायल के संग रायपुर जाके उंखर पूरा इलाज करवावय। संगेच रेड क्रॉस अऊ प्रशासन कोति ले एक पटवारी ल घलोक रेफेर करे गए मजदूर मन के संग रायपुर जाय के हुकुम दीन। ये मौका म कलेक्टर ह मजदूर मन के परिजन मन ल कहिन के प्रशासन ये ठउका करही के घायल मन के बने सहिन इलाज होवय।
मिले जानकारी के मुताबिक पुसौर के तेतला म शक्ति पेपर मिल जेमा पेपर ल रिसायकल करे के काम करे जाथे। लॉक डाउन के समय बंद ये मिल ल फेर चालू करे के पहिली मजदूर मन रिसायकल चैम्बर के सफाई करत रहिन। उही बेरा म हानिकारक गैस के संपर्क म आए ले मजदूर मन के तबियत बिगड़े लगिस। ओ मन ल इलाज बर तुरते रायगढ़ के संजीवनी चिकित्सालय म भर्ती करवाए गीस। भर्ती करवाये गए कुल 07 मजदूर मन म 03 मजदूर डोलामणि सिदार उमर 35 साल, सुरेंद्र गुप्ता उमर 28 साल, अपधर मालाकार उमर 40 साल ल बेहतर इलाज बर रायपुर रेफेर करे गीस। जेखर बर प्रशासन ह एम्बुलेंस अऊ आन व्यवस्था करवाइस। बांचे 04 मजदूर पुरन्धन कुमार उमर 21 साल, अनिल कुमार उमर 22 साल, निमाणी भोय उमर 40 साल, रंजीत सिंग उमर 34 साल के इलाज संजीवनी म ही जारी रहिही। जेखर बर संजीवनी अस्पताल प्रशासन ल जरूरी हुकुम देहे गए हे। ये दौरान एडिशनल एसपी श्री अभिषेक वर्मा, एसडीएम रायगढ़ श्री युगल किशोर उर्वशा, मुख्य चिकित्सा अउर स्वास्थ्य अधिकारी श्री एस एन केशरी घलोक मौजूद रहिन।
