प्रदेश के श्रमिक मन ल श्रम विभाग के कल्याणकारी योजना के मिलत हे लाभ
मजदूर के बेटी अब नई करे मजदूरी
रायपुर, सब बड़े ले बड़े काम के सफलता के सुरुआत एक छोटकन प्रयास ले होथे। छत्तीसगढ़ के मजदूर के बेटी मन ह आज ए वाक्य ल चरितार्थ कर दिस हे। धमेला अउ कुदाली चलोइया मजदूर मां के बेटी मन ह आज इतिहास रचत हे, अब अल्का ह डॉक्टर बनोइया हे। ए कहानी हर ए कांकेर के गांव बागोडार के रहोइया मजदूर श्रीमती कलाबाई मरकाम के बेटी अल्का मरकाम के।
श्रीमती कलाबाई बतइस कि ओ ह रेजा के रूप म बुता करथे अउ ओकर पति ह खेती बुता करथे अउ। बेटी अल्का ह गांव म ही अपन पढ़ई पूरा करिस अउ ओकर बाद म नीट के परीक्षा पास कर के आज स्वर्गीय बलीराम कश्यप मेमोरियल शासकीय चिकित्सा महाविद्यालय, जगदलपुर ले एमबीबीएस म चतुर्थ वर्ष म पढ़ई करत हे। कलाबाई ह खुसि खुसी बतात रहिस हे कि मोर बेटी ल छत्तीसगढ़ भवन एवं सन्निर्माण कर्मकार कल्याण मंडल ले मेधावी छात्र-छात्रा शिक्षा प्रोत्साहन योजना के लाभ मिले हे जेकर के ओला अपन उच्च शिक्षा पूरा करे म अबड़ मदद मिलत हे। अल्का ल 1 मई के राजधानी रायपुर म आयोजित श्रम सम्मेलन मेम सम्मानित तको करे गईस हे।
मजदूर के बेटी बनीस सामुदायिक स्वास्थ्य अधिकारी
कांकेर जिला के चारामा तहसील के गाँव डोकला के रहोइया चेतन राम साहू बताथे कि ओ ह पेशा ले मजदूर हे अउ बढ़ई के काम करथे। परिवार ले भरण-पोषण घलो मजदूरी कर के ही करथे। ओ ह बताइस कि ओकर बेटी पुष्पलता बचपन ले ही पढई म होनहार रहिस हे। गांव म ओकर पढ़ई होइस अउ 11वीं – 12वीं कक्षा के पढ़ाई करे ब ओ ह गांव से दूरिहा भर्रीटोला रेंगत जावय। स्कूल के बाद म ओ ह बीएससी के पढ़ाई सुरू करिस। हमन ओकर उच्च शिक्षा ल लेके चिंतित रहेन, लेकिन छत्तीसगढ़ भवन एवं अन्य सन्निर्माण कर्मकार मंडल म कुली प्रवर्ग म पंजीयन होए ले विभागीय योजना के लाभ मिलिस अउ आर्थिक सहायता मिलिस। श्रम विभाग कती ले दीए गए सहयता ले ही ओ ह अपन बेटी ले नर्सिंग के पढ़ई पूरा करवाईस। आज पुष्पलता सामुदायिक स्वास्थ्य अधिकारी के रूप म चारामा के चारभाठा हेल्थ एवं वेलनेस सेंटर म पदस्थ हवय। अंतर्राष्ट्रीय श्रमिक दिवस म ओला राजधानी म आयोजित श्रम सम्मेलन म सम्मानित करे गईस। पुष्पलता अउ अल्का के पूरा परिवार ह मुख्यमंत्री भूपेश बघेल ल श्रमिक हितैषी योजना ब आभार व्यक्त करिस हे।