*शिक्षा के संग खेल अउ अनुशासन घलो जरूरी, छात्र जीवन म समझे ब लागही समय के कीमतः मुख्यमंत्री*
*मुख्यमंत्री ह प्रो जे एन पांडेय शासकीय उत्कृष्ट हिन्दी माध्यम स्कूल के जीर्णोद्धार ब 5 करोड़ रूपिया के स्वीकृति दिस*
*मुख्यमंत्री ह विद्यार्थी, शिक्षक-शिक्षिका, प्राचार्य अउ अभिभावक मन ल नवा शिक्षा सत्र के सुभारंभ अउ शाला प्रवेशोत्सव के दिस बधई*
रायपुर, 26 जून 2023, आज के दौर म स्कूल म शिक्षा ले वातावरण बनाना जरूरी हे। लईका मन ल शिक्षा के संग खेलकूद अउ अनुशासन म घलो धियान देना हे। छात्र जीवन म ही समय के कीमत समझे ब लागही। उक्त बात ल मुख्यमंत्री श्री भूपेश बघेल ह शिक्षा सत्र 2023-24 के सुभारंभ अउ शाला प्रवेशोत्सव के मउका म आज प्रोफेसर जेएन पांडेय शासकीय उत्कृष्ट हिन्दी माध्यम विद्यालय म कहिस। मुख्यमंत्री ह अपन संबोधन म कहिस कि हरेक स्कूल शिक्षा के मंदिर होथे अऊ ए मंदिर ल घलो हमेसा सफ्फा सुथरा रहना चाहिए। मुख्यमंत्री ह अपन संबोधन म कहिस कि स्वामी आत्मानंद स्कूल के खुले ले राज्य म शिक्षा के प्रति फेर से रूझान बाढ़ीस हे अउ वर्तमान म प्रत्येक वर्ग के लोगन म अपन लईका मन ल ए स्कूल म पढ़ाए ब प्रयास करत हे।
*मुख्यमंत्री ह तिलक लगा के अउ मिठई खवा के छात्र छात्रा मन ल कराइस शाला प्रवेश*
मुख्यमंत्री ह शाला प्रवेशोत्सव के मउका म स्कूली लईका मन ल टिका लगा के, माला पहिरा के अउ उमन ल मिठई खवा के शाला प्रवेश कराइस। अउ संगे म मुख्यमंत्री ह स्कूली लईका मन ल गणवेश, पुस्तक अउ स्कूल बेग घलो बाटिस ।
*स्कूल के जीर्णोद्धार ब 5 करोड़ रूपिया के राशि स्वीकृत*
मुख्यमंत्री ह ऐतिहासिक प्रो जेएन पांडेय शासकीय उत्कृष्ट हिन्दी माध्यम स्कूल के जीर्णोद्धार ब 5 करोड़ रूपिया के राशि स्वीकृत करत हुए कहिस कि शिक्षा के मंदिर ल सुदृढ़ अउ सुघ्घर बनाए ब पईसा के कमी कभु आड़े नई आए। मुख्यमंत्री ह कहिस कि ओ ह प्रदेश के स्कूल के जीर्णोद्धार अउ मरम्मत ब बजट म 12 सौ करोड़ रूपिया के राशि स्वीकृत करे रहिस हे। ए राशि ले वर्तमान म 23 हजार स्कूल म काम बुता चलत हे।
*दूसर चरण म 4318 बालवाडी के सुभारंभ*
शाला प्रवेशोत्सव के अवसर म मुख्यमंत्री बालवाड़ी योजना के दूसर चरण म वर्चुअल रूप ले 4 हजार 3 सौ 18 बालवाडी के सुभारंभ करिस। राज्य म बालवाडी बने ले पांच ले छः बछर के लईका मन ल बुनियादी शिक्षा के प्रति जागरुक करे के प्रयास करे जाथे। बालवाड़ी म लईका मन ल खेल-खेल म शिक्षा दिए जाथे जेकर से स्कूल जाए म उमन ल कोनो घबराहट के सामना झन करे ल परय । बालवाड़ी योजना के पहिली चरण म 5 सितंबर 2022 के 5 हजार 1 सौ 73 बालवाड़ी ले सुरूआत करे गय रहिस हे।
Neha Rathore
