मंत्री श्री लखमा के हाथ ट्राईसाईकिल पाके दिव्यांग कुन्ती अऊ टेमिन होइन खुश

महासमुंद, 13फरवरी 2021। वाणिज्य अऊ उद्योग अऊ महासमुंद जिला के प्रभारी मंत्री श्री कवासी लखमा ह आज महासमुंद प्रवास के समय हितग्राही मन ल कई ठन विभाग कोति ले सामान बांटिन। चार बिहान समूह के महिला मन ल करीबन चार लाख रूपिया के चेक अऊ एक महिला समूह ल पोल फेंसिंग वर्क के ऑर्डर सौंपिन। खेल अऊ युवा कल्याण विभाग कोति ले हॉकी संघ महासमुन्द ल गोल कीपर सेट अऊ एक दर्जन हॉकीस्टीक अऊ बिहाझर बागबाहरा संस्था ल तीरंदाजी के सेट वितरित करिन। उद्यानिकी विभाग ले तीन किसान मन ल सब्जी के मिनीकिट घलोक सौंपिन। दू दिव्यांग युवति कुन्ती धीवर अऊ टेमिन ल बैटरी चलित मोटराईज ट्राईसाईकिल सौंपिन। दुनों युवति मन ह हॉर्न बजाके अपन खुशी जताईन। दुनों युवति कुन्ती धीवर अऊ टेमिन ह जल्दी प्रतिक्रिया देवत कहिन कि ओखर मोटराईज साईकल के इंतजार आज खतम हो गीस। मंत्री के हाथ एला पाके हम बहुत खुश हन। हमन दसवीं पास हन अऊ घर म ही सिलाई-कढ़ाई के काम करथन। मोटराईज साईकल मिले ले बाजार के कामकाज घलोक अब हम बिना सहारा के कर सकबोन। संगेच सिलाई-कढ़ाई बर मनखे मन के निवास म आना-जाना घलोक कर सकबोन।