प्रदेश के नवा औद्योगिक नीति कृषि अउ वन उपर होही आधारित: उद्योग मंत्री देवांगन

रायपुर, 18 फरवरी 2024। इंडियन चैंम्बर ऑफ बिजनेस एंड कॉमर्स कोति ले वार्षिक ग्लोबल समिट के आयोजन गए सनिच्‍चर के नई दिल्ली के जनपद रोड स्थित डॉ अंबेडकर ऑडिटोरियम म होइस। वार्षिक ग्लोबल समिट ग्रामीण इकोनामिक फोरम अऊ भारत सरकार के एमएसएमई मंत्रालय कोति ले आयोजित करे गए रहिस। छत्तीसगढ़ राज्य के वाणिज्य उद्योग अऊ श्रम मंत्री श्री लखन लाल देवांगन प्रतिनिधि मंडल के संग ये कार्यक्रम म सामिल होइन। ए अवसर म मंत्री श्री देवांगन ह कहिन कि देश के किसान मन ल कहूं हम आत्मनिर्भर बनाबो त निश्चित रूप ले हमला कृषि उपर आधारित उद्योग मन उपर फोकस करना होही। छत्तीसगढ़ राज्य एक कृषि आधारित प्रदेश हे एखर सेती एला धान के कटोरा कहिथें। छत्तीसगढ़ राज्य म 44% जंगल हे अऊ निश्चित रूप ले ग्रामीण अर्थव्यवस्था ल विकसित करे बर कृषि अउ वन के प्रमुखता ले भागीदारी रइही।
मंत्री श्री देवांगन ह कहिन के छत्तीसगढ़ राज्य के नवा औद्योगिक नीति म निश्चित रूप ले कृषि उद्यानिकी अउ वन उपर आधारित उद्योग मन ल बढ़ावा दे बर नीति रखे जाही, जेखर से प्रदेश के किसान मन ल अऊ आदिवासी अंचल म रहइया मनखे मन ल एकर सीधा लाभ मिल सकय। एखर से प्रदेश के कृषि उत्पादन के मूल्य संवर्धन म बढ़ोतरी हो सकही। कार्यक्रम के मुख्य अतिथि श्री नारायण राणे मंत्री सूक्ष्म, लघु अऊ मध्यम उद्यम भारत सरकार घलोक सामिल होइन। उमन ए अवसर म कहिन कि अवइया बेरा डेवलपमेंट के हे अऊ एला ध्यान म रखके नीति बनाना होही। इंडियन चैंम्बर ऑफ बिजनेस एंड कॉमर्स के ये पहल निश्चित रूप ले अहम रोल अदा करही।
ए बेरा म मंत्री श्री लखन लाल देवांगन के संग आन प्रतिनिधि कोरबा नगर निगम के पार्षद श्री नरेंद्र देवांगन अउ श्री प्रफुल्ल तिवारी, श्री नरेंद्र पाटनवार, महाप्रबंधक सीएसआईडीसी श्री ओ.पी बंजारे घलोक उपस्थित रहिन।