वाणिज्य अउ उद्योग मंत्री श्री अग्रसेन कन्या महाविद्यालय के वार्षिकोत्सव म होइन सामिल

कोरबा, 11 फरवरी 2024। प्रदेश के वाणिज्य उद्योग अउ श्रम मंत्री श्री लखन लाल देवांगन ह काली कोरबा के श्री अग्रसेन कन्या महाविद्यालय के वार्षिकोत्सव समारोह म मुख्य अतिथि के रूप म सामिल होइन अऊ पढ़ईया लईका मन के उत्साहवर्धन करिन। ए बेरा म उमन परीक्षा म उत्तीर्ण मेघावी छात्रा मन ल सम्मानित करिन। उमन कहिन कि आज के लइका देश के भविष्य हे। अइसन आयोजन ले लइका मन म उत्साहवर्धन होथे। सांस्कृतिक कार्यक्रम ले लइका मन म लुकाय प्रतिभा सामने आथे। श्री देवांगन ह कहिन कि कोरोना काल म जिंकर माता पिता के निधन हो गए रहिस ए महाविद्यालय ह अइसन लइका मन ल निःशुल्क शिक्षा देहे जात हे। ये एक सराहनीय प्रयास हे। आयोजक मन ह बताइन कि ए कॉलेज के स्थापना साल 1999 म होए रहिस, जेखर आज 25 साल पूरा होवइया हे। अभी हाल म इहां 1200 लइका इहां पढ़त हें।
केबिनेट मंत्री श्री देवांगन ह कहिन कि निश्चित तौर म संस्कार अउ शिक्षा ले लइका मन के भविष्य बेहतर बनाय जा सकत हे। उद्योग संघ के जिला अध्यक्ष श्रीकांत बुधिया ह प्रदेश सरकार के बजट म एल्युमिनियम पार्क बर उद्योग मंत्री के आभार जताइस। ए अवसर म मंत्री ह शोध म आधारित 2 पुस्तक के विमोचन घलोक करिन। समारोह म श्री अग्रसेन शिक्षण समिति के अध्यक्ष श्री राजेन्द्र अग्रवाल के अलावा भगवान दास अग्रवाल, संजय बुधिया, श्यामलाल अग्रवाल, शिव अग्रवाल अउ मनोज गोयल संग गणमान्य नागरिक उपस्थित रहिन।