सौर ऊर्जा ले आत्मनिर्भर बनिस लखनपुर के सदानंद गुप्ता

तीन किलोवाट प्लांट ले रोजाना 15 यूनिट तक बिजली उत्पादन
शासन के डबल सब्सिडी ले पीएम सुरुज घर-मुफ्त बिजली योजना के बढ़त हे रुझान
सरगुजा, ऊर्जा संकट अऊ महंगा बिजली बिल ले निजात पाय के रद्दा अब सौर ऊर्जा ले होके गुजरत हे। सरगुजा जिला के लखनपुर नगर पंचायत के रहवइया श्री सदानंद गुप्ता ह  अपन घर के छत म 3 किलोवाट क्षमता के सोलर प्लांट लगाके ये साबित करे हे के शासन के योजना आम मनखे मन के जीवन ल बदलत हे। ए प्लांट ले रोजाना 10 ले 15 यूनिट तक बिजली उत्पादन होवत हे, जेखर से घर के पूरा खपत आसानी ले पूरा हो जात हे। श्री गुप्ता ह बताइस के योजना अंतर्गत ओ ल केंद्र सरकार ले 78 हजार रूपिया अऊ राज्य सरकार ले 30 हजार रूपिया, कुल 1 लाख 8 हजार रूपिया के सब्सिडी के लाभ मिलही।
श्री गुप्ता ह बताइस के पीएम सुरुज घर-मुफ्त बिजली योजना के तहत  विद्युत विभाग ले अनुबंध होय हे। एखर सबले बड़े खासियत ये हे के उपभोक्ता केवल बिजली खरचा करइया भर नइ हे, बल्कि अकतहा बिजली उत्पादन करके ऊर्जादाता बनत हे। अकतहा बिजली ऑन ग्रिड के माध्यम ले विद्युत विभाग ल रिटर्न हो जात हे, जेखर भुगतान विद्युत विभाग कोति ले वित्तीय साल के आखरी म करे जाही।
ए योजना ले आम नागरिक मन ल बिजली बिल के समस्या ले निजात मिलत हे अऊ उमन भविष्य म मुफ्त बिजली के लाभ उठा सकत हें। उमन कहिन के ये पहल उपभोक्ता मन ल ऊर्जा आत्मनिर्भरता कोति ले जात हे।
श्री गुप्ता ह कहिस के शासन कोति ले देहे जात डबल सब्सिडी ह मनखे मन के विश्वास बढ़ाए हे। पहिली जिहां सौर ऊर्जा ल महंगा विकल्प माने जात रहिस, उहें अब सब्सिडी के सेती ले ये आम परिवार मन के पहुंच म हे। प्रधानमंत्री सूर्यघर मुफ्त बिजली योजना के अनुदान केन्द्र सरकार के संग 1 किलोवाट प्रणाली खातिर 30 हजार रूपिया अऊ राज्य सरकार 15 हजार रूपिया, 2 किलोवाट क्षमता वाले संयंत्र म केंद्र सरकार 60 हजार अऊ राज्य सरकार 30 हजार अऊ 3 किलोवाट खातिर केंद्र सरकार 78 हजार रूपिया अऊ राज्य सरकार 30 हजार के सब्सिडी देवत हे। उमन केंद्र अऊ राज्य सरकार के आभार व्यक्त करत कहिन के डबल सब्सिडी जइसे सुविधा ले मनखे मन के उत्साह बाढ़े हे अऊ अब सबे झन पीएम सुरुज घर-मुफ्त बिजली योजना के लाभ लेके बिजली उपभोक्ता ले ऊर्जादाता बन सकत हें।