सासन के सहयोग अऊ अपन उपर भरोसा ले बदलिस जिनगी के रद्दा

बलरामपुर, छत्तीसगढ़ सासन के जनकलियानकारी योजना मन ग्रामीण इलाका मं महिला मन के जिनगी मं सुग्‍घर बदलाव लावत हे। सासन के सहयोग, सरलग मिहनत अऊ पक्का संकल्प ले बलरामपुर जिला के विकासखंड रामचंद्रपुर के विजयनगर गाँव के रहवईया श्रीमती बेलाल अंसारी ह आर्थिक रूप ले आत्मनिर्भर अऊ ‘लखपति दीदी’ के रूप मं अपन पहिचान बनाके इलाका के आन महिला मन बर प्रेरणा के स्रोत बन गे हे।
एक बखत श्रीमती बेलाल अंसारी के परिवार ह भारी आर्थिक तंगी ले जूझत रहिस। परिवार के महिना के आय सिरिफ़ 1000 ले 1500 रूपिया के बीच रहिस, जेकर ले घर के जरूरत मन ल पूरा करना घलोक मुस्किल हो गे रहिस। अइसन चुनौती भरे समय मं ‘राष्ट्रीय ग्रामीण आजीविका मिशन’ (बिहान) ओखर बर आसा के किरन बनके अईस। ओ ह स्व-सहायता समूह मं जुड़े के फैसला लीस, जिहाँ सरलग बैठक अऊ गाँव के भ्रमण के माध्यम ले ओला काम-काज अऊ बेपार के नवा समझ मिलिस।
समूह के माध्यम ले श्रीमती अंसारी ह ओसरी-पारी मं जम्मो 2 लाख 72 हजार 650 रूपिया के करजा (ऋण) लीस। ए पूंजी ले ओ ह खेती-किसानी अऊ पशुपालन जइसे अलग-अलग आजीविका के काम मन के सुरुवात करिस। जेकर फलसरूप ओखर आय मं सरलग बढ़त होइस अऊ आज ओखर सालाना आय एक लाख रूपिया ले जादा हो गे हावय।