स्वरोजगार ले होवत हे सालाना एक लाख रुपए ले जादा के आय
उत्तर बस्तर कांकेर, 09 जुलाई 2024। राष्ट्रीय ग्रामीण आजीविका मिशन के तहत स्वसहायता समूह के माध्यम ले महिला मन के जीवन म अड़बड़ बदलाव आए हे। समूह ले जुड़के कई ग्रामीण महिला मन म आर्थिक आत्मनिर्भरता आए हे अऊ प्रधानमंत्री श्री नरेंद्र मोदी के पहल ले कुछ महिला मन अपन आय म वृद्धि करत एक लाख ले जादा के सालाना आय पा के लखपति दीदी बन गए हें। अइसनहे लखपति दीदी कांकेर विकासखंड के गांव सिदेसर के रहइया श्रीमती सविता साहू हे, जे ह समूह ले जुड़के अपन खुद के रोजगार शुरू करे के ठानीस अऊ आज मिनी राईस मिल स्थापित करके आज एक लाख ले घलोक जादा के सालाना आय पावत हे।
श्रीमती सविता साहू ह बताइस कि ओ ह साल 2012 म गायत्री स्व सहायता समूह ले जुड़े हे। शुरूआत म समूह के महिला मन दोना-पत्तल बनाए के काम करत रहिन। एखर बाद मशरूम उत्पादन के काम शुरू करे गीस। ए बीच म वो ह अपन आय ल बढ़ाए बर खुद के रोजगार शुरू करे के बारे म सोचिस। एखर बाद एडीईओ अउ बीपीएम ह ओ ल प्रधानमंत्री स्व रोजगार योजना के अंतर्गत ऋण लेहे के सलाह दीन। फेर वो ह साल 2021 म स्वरोजगार योजनान्तर्गत 10 लाख रूपिया अऊ बिहान ले 05 लाख रूपिया के ऋण लेके मिनी राईस मिल स्थापित करिस। श्रीमती साहू ह बताइस कि ओ अपन पति श्री गौतम साहू के सहयोग ले राईस मिल के बने सहिन संचालन करत हे अऊ लगभग 45 हजार रूपिया महीना के आय अर्जित करत हे। मिले आय ले वो ह समूह ले प्राप्त 05 लाख रूपिया के सबो किश्त जमा कर उरे हे अऊ बैंक ले प्राप्त 10 लाख रूपिया म ले 05 लाख रूपिया के ऋण बाकी हे। ए प्रकार हर महिना क़िश्त जमा करे के बाद लगभग 30 ले 35 हजार रुपिया के आमदनी होवत हे। एखर से वोखर परिवार के वार्षिक आय म घलोक इजाफा होय हे अऊ अपन परिवार के बेहतर ढंग ले पालन-पोषण कर पावत हे।
श्रीमती साहू आज खुद सशक्त होके आन समूह मन के महिला मन ल घलोक आगू बढ़े बर प्रेरित करत हे। वो ह ये बताइस कि समूह के माध्यम ले गांव के महिला मन ल वित्तीय साक्षरता के जानकारी देथे अऊ ओ मन ल स्वरोजगार स्थापित करे अऊ कृषि काम ल आगू बढ़ाए म सहयोग करथे, ताकि ओ मन घलोक आर्थिक रूप ले सशक्त हो सकयं। ए प्रकार स्वसहायता समूह ले जुड़के सविता साहू के जीवन म बहुत बदलाव आए हे अऊ शासन के योजना मन के लाभ लेत आज खुद के रोजगार स्थापित करके एक सफल उद्यमी के रूप म अपन पहिचान बनाए हे। वो ह राष्ट्रीय ग्रामीण आजीविका मिशन अऊ प्रधानमंत्री स्वरोजगार योजना बर प्रधानमंत्री श्री नरेन्द्र मोदी अऊ मुख्यमंत्री श्री विष्णुदेव साय के प्रति आभार प्रकट करे हे।