तेजप्रताप बोलिस- मां के दूध पिए हस त दू-दू हाथ कर ले
पटना, नेता प्रतिपक्ष तेजस्वी यादव ह बिरसपत के दिल्ली म बचपन के संगवारी रचेल ले बिहाव कर लेहे हे। लालू यादव के बेटा के ईसई लड़की ले शादी करे के बाद राबड़ी के भाई साधु यादव नाराज हो गे हे। वो ह तेजस्वी-रचेल के संग लालू-राबड़ी के बेटी मन के पोल खोले तक के बात कहे हे। अपन बयान के 24 घंटा के बाद साधु ह लालू के बेटा-बेटी मन उपर तंज कसत हे। जागरन पेपर के मुताबिक एखर शुरुआत बड़े बेटा तेजप्रताप ह के। ट्विटर म सनिच्चर के समस्तीपुर के हसनपुर विधानसभा के विधायक तेजप्रताप ह ममा के बिना नाम लेहे इशारा म कहिन कि बिहार आवत हंव, गर्दा उड़ा दूंहूं। बड़े भइया के समर्थन म छोटे बहिनी रोहिणी आईस अऊ एक कदम आगू निकल गे। रोहिणी ह ममा ल कंस तक कहि दीस।
ट्विटर म सनिच्चर के लालू-राबड़ी के बेटी रोहिणी आचार्या ह ममा के बिना नाम लेहे लिखिस, कंस आजो समाज म मौजूद हे। इमन साबित कर दीन। रिश्ता निभाना हे त कृष्ण बनव। दुष्ट कंस के जइसे अन्यायी झन बनव…।
एखर पहिली तेजप्रताप ह घलोक ममा ल करारा जवाब देहे हे। ट्विटर के सहारा लेत वो ह लिखे हे, बिहार आवत हंव, गर्दा उड़ा दूंहूं। सियान मन अपन औकात म रहव। पाजामा के बाहिर आए के जरूरत नइ हे। दूसर ट्वीट म लालू के बड़का बेटा तेजप्रताप ह ममा साधु ल हत्यारा बतात लिखिस, हमर मां-बहिनी मन के इज्जत ल सरेआम बेइज्जत करइया ओ ‘कंस’ ल मोर खुला निमंत्रण हे। कहूं अपन मां के दूध पिए हे त मैदान म आके दो-दो हाथ कर लय। औकात हे त आगू म सीधा खड़ा होके ही देखा देवय!
जानबा हे कि सुकरवार के दिन मीडिया ले बात करत साधु आदो ह कहे रहिस कि रेचल ले शादी करे के बाद तेजस्वी क्रिश्चियन हो गे हे। अब ओ मन ल मुख्यमंत्री बने के सपना देखना छोड़ देना चाही। नेता प्रतिपक्ष के ममा अपन जात-सगा म भांचा के शादी नइ होए ले नाराज हे। साधु ह लालू-राबड़ी के बेटी मन के पोल खोले के बात कहत बोले रहिस कि तेजस्वी के पटना आए म ओखर जूता ले स्वागत करे जाही।