प्रभु श्रीराम के ममा गांव अऊ माता शबरी के पावन भुइंया म होइस राज्य स्तरीय युवा कवि सम्मेलन के आयोजन
रायपुर/ छत्तीसगढ़ के साहित्यिक, सांस्कृतिक अऊ कलात्मक परंपरा मन ल नवा ऊर्जा देहे के उद्देश्य ले पाछू रतिहा आयोजित राज्य स्तरीय युवा कवि सम्मेलन म मुख्यमंत्री श्री विष्णु देव साय ह प्रभु श्रीराम के ममा गांव अऊ माता शबरी के पावन भुइंया ल वंदन करत कहिन के छत्तीसगढ़ के धरती सदा ले साहित्य अऊ संस्कृति के धरती रहे हे।
मुख्यमंत्री श्री साय ह अपन उद्बोधन म कहिन के महाकवि कालिदास ह इही धरती म मेघदूत जइसे अमर काव्य के रचना करिस, उहें गजानन माधव मुक्तिबोध अऊ पदुमलाल पुन्नालाल बख्शी जइसे यशस्वी साहित्यकार मन ह इही माटी ले अपन पहिचान बनाइन। उमन अपन पहिली संसदीय क्षेत्र रायगढ़ के सुप्रसिद्ध संगीत सम्राट राजा चक्रधर सिंह ल घलोक श्रद्धापूर्वक सुरता करिन।
मुख्यमंत्री श्री साय ह कहिन के छत्तीसगढ़ राज्य युवा आयोग अऊ खेल अऊ युवा कल्याण विभाग के ये उदीम प्रदेश के कला, साहित्य अऊ रचनात्मक प्रतिभा मन ल मंच दे के ओ मन ल प्रोत्साहन देहे के उत्कृष्ट माध्यम हे। उमन कहिन के राज्य सरकार युवा साहित्यकार, रचनाकार अऊ कलाकार मन ल सरलग आगू बढ़े के अवसर देवत हे।
मुख्यमंत्री श्री साय ह संभाग स्तरीय प्रतियोगिता मन ले चुने गे तीनों विजेता मन ल हार्दिक बधाई देवत कहिन के ए मंच के माध्यम ले युवा कवि मनल देश के ख्यातिलब्ध कवि मनले मार्गदर्शन प्राप्त होही, जेखर से ऊंखर रचनात्मक विकास ल नवा दिशा मिलही।
छत्तीसगढ़ के संस्कृति गीत, नृत्य अऊ भावना मनके जीवंत संगम हे : उपमुख्यमंत्री श्री अरुण साव
कार्यक्रम ल संबोधित करत उपमुख्यमंत्री अऊ खेल अऊ युवा कल्याण मंत्री श्री अरुण साव ह कहिन के ये सम्मेलन केवल प्रतियोगिता न ही, बल्कि युवा कवि मन बर सीखे अऊ सृजन के प्रेरणा के अवसर हे। उमन कहिन के छत्तीसगढ़ के कला अऊ संस्कृति सुरू ले ही समृद्ध रहे हे — इहां मनुष्य के जीवन ले लेके मृत्यु तक हर अवसर म गीत गाए जाथे।
उमन उदाहरण देवत कहिन के जब खेत मन म बोआई के समय आथे, त पूरा वातावरण म ददरिया के मधुर सुर गूंजथे। इहां रंग रंग के वाद्य, गीत, नृत्य अऊ लोककला मन के अनूठी परंपरा रहे हे। श्री साव ह कहिन के ये प्रदेश संत, महात्मा अऊ कवि मनके कर्मभूमि रहिस हे, जेमां ले समाज ल हमेसा नवा दिशा मिले हे। उमन प्रदेशभर ले आए युवा कवि मनके उज्ज्वल भविष्य के कामना करत ओ मन ल अपन रचना मन के माध्यम ले समाज म सकारात्मक बदलाव लाय के आह्वान करिन।
प्रख्यात कवि मन के मनमोहक काव्यपाठ
सम्मेलन म देश के प्रतिष्ठित कवि श्री शशिकांत यादव, श्री दिनेश बावरा, श्री नीलोत्पल मृणाल, सुश्री कविता तिवारी अऊ सुश्री मनु वैशाली ह अपन ओजपूर्ण अऊ भावनात्मक कविता मनले श्रोता मनल मंत्रमुग्ध कर दीन। पूरा सभागार ताली के गड़गड़ाहट ले गूंज उठिस।
प्रदेश के प्रतिभा मन ल मिलीस सम्मान
राज्य स्तरीय युवा कवि प्रतियोगिता म बिलासपुर जिला के निधि तिवारी ह पहिली, मीरा मृदु ह दूसर अऊ कोरिया जिला के अलीशा शेख ह तीसर जगा पाइन। मुख्यमंत्री श्री साय ह सबो विजेता प्रतिभागी मन ल सम्मानित करिन अऊ ऊंखर उज्ज्वल भविष्य के कामना करिन।
एखर बेरा म उच्च शिक्षा मंत्री श्री टंक राम वर्मा, महिला अऊ बाल विकास मंत्री श्रीमती लक्ष्मी राजवाड़े, कौशल विकास मंत्री बिर खुशवंत साहेब, पर्यटन अऊ संस्कृति मंत्री श्री राजेश अग्रवाल, विधायक श्री मोतीलाल साहू, छत्तीसगढ़ राज्य युवा आयोग के अध्यक्ष श्री विश्व विजय सिंह तोमर संग कई ठन आयोग अऊ मण्डल के अध्यक्ष, जनप्रतिनिधि, साहित्यकार, कवि अऊ बड़ संख्या म श्रोता उपस्थित रहिन।