शासकीय उच्चतर माध्यमिक विद्यालय ईसलनार के 19 छात्रा मन ल मिलिस सायकिल

कोंडागांव, बस्तर विकास प्राधिकरण के उपाध्यक्ष अऊ कोंडागांव विधायक सुश्री लता उसेंडी ह आज ‘निसुल्क सरस्वती सायकल वितरण योजना’ के तहत ग्राम पंचायत ईसलनार के शासकीय उच्चतर माध्यमिक विद्यालय के 19 छात्रा मन ल सायकल बांटिन। संगेच ग्राम ईसलनार मं पांच लाख रूपिया के लागत ले बनइया पुलिया निर्माण काम के भूमिपूजन घलोक करिस। एखर संगे-संग लइका मन बर कैरम, बॉलीबॉल, फुटबॉल, क्रिकेट किट अऊ आन जरूरी खेल सामान बांटे गीस।
कार्यक्रम मं समाज कल्यान विभाग कोति ले 03 हितग्राही मन ल सहायक उपकरण देहे गीस। एमा जैतराम सोरी ल सुन्ने के मसीन (श्रवण यंत्र), चौतीबाई ल छड़ी अऊ बाइसराम ल ट्राइसिकल मिलिस।
ए मउका मं जिला पंचायत अध्यक्ष श्रीमती रीता शोरी, जनपद पंचायत अध्यक्ष श्रीमती अनीता कोर्राम, उपाध्यक्ष श्री टोमद्र ठाकुर, श्री संतोष पात्र, श्रीमती रीना सोरी, श्री धनजू मरकाम, श्री विक्रम सोरी, श्री मीनू मरकाम, श्री अजमिला सोरी अऊ श्री जैनलाल कोर्राम समेत आन स्थानीय जनप्रतिनिधि मन उपस्थित रहिन।