- लॉकडाउन के सेती आन राज्य मन म फंसे छत्तीसगढ़ के श्रमिक अऊ पढ़ईया लईका मन के तकलीफ के जानकारी दीन
- छत्तीसगढ़ के मुख्य सचिव ह ये संबंध म केन्द्रीय गृह सचिव ल लिखिन पत्र
- आन राज्य मन म फंसे श्रमिक अउ पढ़ईया लईका मन के छत्तीसगढ़ वापसी के अनुमति देहे के करिन आग्रह
रायपुर 23 अप्रैल 2020। मुख्यमंत्री श्री भूपेश बघेल ह केंद्रीय गृह मंत्री श्री अमित शाह ले दूरभाष म चर्चा करके ओ मन ल आन राज्य मन म फंसे छत्तीसगढ़ के श्रमिक अऊ कोटा म अध्ययनरत पढ़ईया लईका मन के समस्या मन ले अवगत कराइन। चर्चा के समय केंद्रीय गृह मंत्री ह मुख्यमंत्री श्री बघेल ल आश्वस्त करिन हें के राज्य सरकार कोति ले ये आशय के प्रस्ताव मिले म जल्दी निर्णय ले जाही।
मुख्यमंत्री के निर्देश म छत्तीसगढ़ के मुख्य सचिव श्री आर.पी.मंडल ह ये तारतम्य म केन्द्रीय गृह सचिव श्री अजय भल्ला ल पत्र प्रेषित करके आन राज्य मन म फंसे श्रमिक अउ पढ़ईया लईका मन के छत्तीसगढ़ वापसी के अनुमति देहे के आग्रह करे हें।
श्री मंडल ह पत्र म लिखे हें के पूरा देश म कोविड-19 के रोकथाम बर लागू करे लाकडाउन के छत्तीसगढ़ म घलोक कड़ाई ले पालन करे जात हे। छत्तीसगढ़ के आन राज्य मन ले लगइया सीमा मन म आवागमन उपर रोक लगाए गए हे। एखर से राज्य म कोविड-19 वायरस के फैलाव ल रोके म मदद मिले हे। लाकडाउन के सेती छत्तीसगढ़ के मजदूर आन राज्य महाराष्ट्र, कर्नाटक, पंजाब, हरियाणा, जम्मू अऊ कश्मीर म फंसे हे। राज्य सरकार कोति ले आन राज्य मन म फंसे श्रमिक मन के समस्या मन के निराकरण बर यथा संभव प्रयास करे गए हे। ऊंखर भोजन के इंतजाम सुनिश्चित करे के संग ओ मन ल आर्थिक सहायता घलोक पहुंचाए गए हे।
मुख्य सचिव ह पत्र म लिखे हें के लाकडाउन के एक महिना होए के सेती छत्तीसगढ़ म बहुत अकन वर्ग कोति ले पढ़ईया लईका मन अऊ मजदूर मन ल आन राज्य मन म होवत कठिनाई के संबंध म बात उठाए गए हे। एखर अलावा कुछ राज्य मन ह कोटा ले पढ़ईया लईका मन ल ऊंखर राज्य म लहुटे के अनुमति देहे हे। छत्तीसगढ़ सरकार घलोक ए पढ़ईया लईका मन अऊ मजदूर मन ल ऊंखर घर वापस लाय के इच्छुक हे। मुख्य सचिव श्री मंडल ह केन्द्र सरकार ले मानवीय आधार म छत्तीसगढ़ सरकार ल कोटा ले पढ़ईया लईका मन ल अऊ आन राज्य मन ले मजदूर मन के वापसी के अनुमति प्रदान करे के आग्रह करे हें। श्री मंडल ह पढ़ईया लईका मन अऊ मजदूर मन के छत्तीसगढ़ लाए म सहयोग करे अऊ सुरक्षित आवागमन बर पास प्रदान करे बर आन राज्य मन ल निर्देशित करे के आग्रह घलोक केन्द्रीय गृह सचिव ले करे हें।
श्री मंडल ह पत्र म लिखे हें के अनुमति मिले ले ए पढ़ईया लईका मन अऊ मजदूर मन के चिन्तित परिवार ल राहत मिलही। छत्तीसगढ़ सरकार छत्तीसगढ़ वापस अवइया सबो मनखे मन ल क्वारेंटाइन म रखना सुनिश्चित करही। श्री मंडल ह एखर बर लिखित अनुमति प्रदान करे के आग्रह केन्द्रीय गृह सचिव ले करे हें।