रायपुर, छत्तीसगढ़ सरकार के सुराजी गांव योजना के तहत जिला म गौठान मन के काम तेजी ले चलत हे। जिला के चारो विकासखण्ड मन म पहिली चरण म 97 गौठान मन के निर्माण करे जात हे। जिला पंचायत के मुख्य कार्यपालन डॉ. गौरव कुमार सिंह ह आज अभनुपर विकासखण्ड के ग्राम पलौद, टेकारी, रवेली, परसदा, ढोढरा, चण्डी, पिपरौद, नवागांव, जौंदा, तोरला, कठिया म निर्मित गौठान मन के निरीक्षण करिस। उमन इहां मवेशी मन बर चारा, पानी अऊ शेड के व्यवस्था के जायजा लीन अऊ व्यवस्था के संबंध म अधिकारी मन ल जरूरी निर्देश दीन। डॉ.सिंह ह गौठान मन म वर्मी कम्पोस्ट निर्माण बर बनाय गे सीपीटी अऊ वृक्षारोपण काम के घलोक निरीक्षण करके अधिकारी मन ल निर्देशित दीन।
जिला पंचायत के मुख्य कार्यपालन अधिकारी डॉ. सिंह ह ग्राम पंचायत रवेली अऊ परसदा म संचालित आंगनबाड़ी केन्द्र अऊ स्कूल के घलोक निरीक्षण करिन उहां के व्यवस्था मन के जायजा लीन। डॉ. सिंह ह आंगनबाड़ी केन्द्र म लइका मन ल दिए जात भोजन अऊ स्टोर के निरीक्षण करिन। अइसनहे स्कूल म मध्यान्ह भोजन संग लइका मन ल पुस्तक अऊ गणवेश वितरण के जायजा लीन। उमन लइका मन के प्रतिभा ल उभारे बर स्कूल मन म हर एक हफ्ता प्रश्नोत्तरी, निबंध, वाद-विवाद, तात्कालिक भाषण अऊ सोचे, समझे अउ लिखे के क्षमता के विकास करे के उद्देश्य ले प्रतियोगिता आयोजित करे के निर्देश दीन। उमन कहिन कि पाठ्यक्रम ल पूरा करे के संगें-संग लइका मन ल प्रतियोगी परीक्षा मन के तैयारी बर मार्गदर्शन घलोक दंय। डॉ. सिंह ह उप स्वास्थ्य केन्द्र रवेली के घलोक निरीक्षण करके उहां मरीज मन ल दिए जात स्वास्थ्य सेवा मन के जानकारी लीन।
