रायपुर, 12 जनवरी, 2020 खेल अउर युवा कल्याण मंत्री श्री उमेश पटेल ह काली न्यू सर्किट हाउस म आज 12 जनवरी ले शुरू होवत राज्य युवा महोत्सव के संबंध म पत्रकार मन ले चर्चा करिन। श्री पटेल ह बताइस कि साइंस कॉलेज मैदान म स्वामी विवेकानंद के जयंती म राज्य स्तरीय युवा महोत्सव के आयोजन करे जात हे। 12 ले 14 जनवरी तक चलइया ये महोत्सव के शुभारंभ राज्यपाल सुश्री अनुसुईया उइके करहीं। शुभारंभ समारोह मंझनिया 12 बजे होही। समारोह के अध्यक्षता मुख्यमंत्री श्री भूपेश बघेल करहीं। कार्यक्रम म विधानसभा अध्यक्ष डॉ. चरणदास महंत, मंत्रिमंडल के सदस्य संग आन जनप्रतिनिधि मन सामिल होहीं।
श्री पटेल ह बताइस कि प्रदेश ले करीबन 7000 भाग लेवइया सामिल होहीं, इंकर बर 32 जगा म ऊंखर रहे के व्यवस्था करे गए हे। युवा महोत्सव म युवा मन ल कई ठन कार्यक्रम मन के प्रस्तुति बर 10 जगा निरधारित करे गए हे, एमां ले तीन मंच साइंस कॉलेज मैदान म बनाए गए हे। एखर अलावा खेल संचालनालय के ऊपर मंजिल स्थित हॉल, पंडित दीनदयाल उपाध्याय ऑडिटोरियम के तीनों हॉल, विज्ञान महाविद्यालय ऑडिटोरियम, पंडित रविशंकर विश्वविद्यालय के प्रेक्षागृह अउर खेल मैदान म आयोजित होही। युवा महोत्सव म युवा मन बर 37 विधा मन म 821 आने-आने कार्यक्रम होही। एमां मुख्य रूप ले पारंपरिक लोक-नृत्य, लोक गीत, एकांकी नाटक, क्विज प्रतियोगिता, चित्रकला, निबंध, तत्कालिक भाषण, छत्तीसगढ़ी परिधान मन उपर आधारित फैंशन प्रतियोगिता आयोजित होही। एखर अलावा छत्तीसगढ़ी व्यंजन उपर आधारित फूड फेस्टिवल के आयोजन करे जाही। युवा महोत्सव के समय खो-खो, कब्बड्डी के अलावा ग्रामीण पृष्ठभूमि के परम्परागत खेल भौंरा, फुगड़ी, गेंड़ी दौड़-चाल के प्रतियोगिता आयोजित करे जाही।
श्री पटेल ह पत्रकार मन ल बताइस कि महोत्सव म शास्त्रीय नृत्य, मणिपुरी, ओडिसी, भरतनाट्यम, कथक, कुचिपुड़ी के संग शास्त्रीय संगीत के प्रतियोगिता होही। महोत्सव म सितार, बांसुरी, गिटार, तबला, वीणा, हारमोनियम, मृदंगम वादन के प्रतियोगिता होही। प्रदेश म होए विकास कार्य मन के एक प्रदर्शनी घलोक लगाए जाही। प्रदर्शनी स्थल म संस्कृति अऊ पर्यटन विभाग कोति ले राज्य के पर्यटन अउर पुरातात्विक स्थल मन के संबंध म प्रदर्शनी घलोक लगाए जाही। युवा मन के रोजगार संबंधी मार्गदर्शन बर रोजगार कार्यालय कोति ले विशेष स्टॉल बनाए गए हे। एखर अलावा कौशल विकास प्राधिकरण कोति ले युवा मन के कौशल उन्नयन बर मार्गदर्शन के व्यवस्था रइही। प्रदेश के कई जिला मन ले आए भाग लेवईया मन बर साईंस कॉलेज मैदान आए अउ जाय बर 195 बस के व्यवस्था करे गए हे। प्रदेश के कई ठन जिला ले आए 7000 ले जादा भाग लेवईया मन के भोजन के व्यवस्था बर तीन विशाल डोम बनाए गए हे, हर एक डोम म एक संग 2000 मनखे मन के खाए के व्यवस्था रइही। महोत्सव के समय कानून व्यवस्था अऊ सुरक्षा बर 3000 ले जादा जवान तैनात रइहीं। मुख्य मंच के बगल म मीडिया सेंटर घलोक बनाए गए हे। मीडिया सेंटर के बगल म ही पुलिस सहायता केंद्र बनाए गए हे। एकरे नजदीकेच आपात चिकित्सा केंद्र होही जिहां चिकित्सक मन के दल तैनात रहिही। सबो व्यवस्था सुचारू रूप ले संचालित करे बर कंट्रोल रूम घलोक इहां बनाए गए हे।
ये मौका म खेल अउर युवा कल्याण विभाग के सचिव श्री सिद्धार्थ कोमल परदेशी, संचालक श्रीमती श्वेता श्रीवास्तव सिन्हा, जनसम्पर्क विभाग के आयुक्त श्री तारन प्रकाश सिन्हा उपस्थित रहिन।
