- अधिवक्ता संघ धरना प्रदर्शन करे बर मजबूर
- पत्नी कहिस पति बिकट ठठात रहिस
मुंगेली, 22 अगस्त 2021। जिला म वकील ह एक डॉक्टर उपर पत्नी के अपहरण करे के केस दर्ज कराए हे. अब ए मामला म नवा मोड़ आ गए हे. वकील के पत्नी पुलिस के आगू आ के अपन पति ऊपर मारपीट करे के आरोप लगाए हे. संगेच प्रताड़ना ले तंग आके अपन मर्जी ले जाय के बात कहे हे. उहें वकील ह राजनीति दबाव म उल्टा केस दर्ज करे के आरोप लगाए हे. वकील संघ ह ए मामला म पुलिस के खिलाफ आंदोलन करे के चेतावनी देहे हे. मामला बीते 18 दिन पहिली के हे. जानबा हे के वकील पति बेदुराम रात्रे ह नेता रमेश कश्यप संग वोखर दू आन संगी मन ऊपर अपन पत्नी के अगवा करे के शिकायत लोरमी थाना म करे रहिस. एखर बाद पीड़ित वकील बेदुराम के पत्नी सुकरवार के थाना पहुंचीस. ए बेरा म आरोपी रमेश कश्यप कुछ नेता मन के संग त उंहे शिकायतकर्ता बेदुराम रात्रे घलोक वकील मन के संग न्याय के गुहार लगाय लोरमी थाना पहुंचे रहिस.
इही बेरा म ओखर पत्नी ह पति ऊपर ही प्रताड़ना के आरोप लगात लिखित शिकायत दे दिस. ए शिकायत के बाद बेदुराम रात्रे ल ही आरोपी बनात पुलिस ह वोकर विरुद्ध 498, 323, 506 धारा के तहत अपराध दर्ज कर लीस. वकील के पत्नी ह बताइस के वोखर शादी 2004 म होए रहिस. शादी के बाद वोखर पति ह आए दिन चरित्र शंका ल लेके ठठात रहिस. जेखर से तंग आके 18 दिन पहिली पत्नी परिचित के संग मुंगेली चल दीस अऊ मुंगेली म रहत रहिस. अपहरण के आरोप के जानकारी होए के बाद लोरमी थाना म पहुंच के पति के खिलाफ मारपीट अऊ प्रताड़ित करे के केस दर्ज कराए हे.
ए मामला म लोरमी थाना प्रभारी राजकुमार साहू ह बताइस के पत्नी के अपहरण के आरोप वकील पति ह लगाए रहिस, फेर पति के शिकायत के मुताबिक अपहृत पत्नी ह खुद थाना म उपस्थित होके अपनेच पति के खिलाफ मारपीट अऊ प्रताड़ना के शिकायत करे हे, जेकर ऊपर कई धारा के तहत पति के खिलाफ अपराध दर्ज कर ले गए हे. संगेच वकील के शिकायत ऊपर जांच करत वोखर पत्नी के बयान दर्ज करे गए हे. आगू नियमानुसार कार्यवाही करे जाही.
ऐति मामला ऊपर वकील बेदुराम रात्रे ह लोरमी पुलिस ऊपर भ्रष्ट होए के आरोप लगात थाना के कार्यप्रणाली ऊपर सवाल खड़े करे हे अउ जल्दी न्याय नइ मिले म आत्मदाह करे के चेतावनी देहे हे. वकील के कहना हे के में अपन पत्नी ले मारपीट नइ करे हंव. एखर प्रत्यक्ष गवाह मोर चार लइका हे. मोला न्याय मिलना तो दूर झूठा केस म फंसाए जात हे. नेता मन के दबाव म मोर खिलाफ ही मुकदमा दर्ज करे जात हे.
ए मामला म वकील रवि शर्मा ह कहिस के अनुसूचित जाति के वकील के खिलाफ राजनीति दबाव म एफआईआर दर्ज करे गए हे. उमन चेतावनी देवत कहे हें के कहूँ पीड़ित वकील ल जल्दी न्याय नइ मिलही त वकील संघ धरना प्रदर्शन करे बर मजबूर हो जाही.
