महासमुंद 30 अगस्त 2021। एक भारत श्रेष्ठ भारत के कार्यक्रम के तहत सुकरवार के दिन गुजरात विधानसभा अध्यक्ष राजेश त्रिवेदी संग 10 विधायक अऊ अधिकारी-कर्मचारी मन समेत 15 सदस्यीय प्रतिनिधिमंडल ह सिरपुर भ्रमण करिस। सब मन ह सिरपुर के लक्ष्मण मंदिर, बौद्ध स्तुप, गंधेश्वर मंदिर, बाजार गुफा ल देखिन अऊ प्राचीन कला के सराहना करिन।
गुजरात विधानसभा अध्यक्ष राजेश त्रिवेदी ह देखे के बाद कहिन के हमला बहुत अच्छा लागिस। बहुत नजदीक ले हमन सिरपुर अऊ छत्तीसगढ़ ल देखेन। देख के ये बात समझ आवत हे के हम पहिली ले ही जुड़े रहेन। इहां आके जानकारी मिलीस के जुन्ना गुजरात के कुछ सिक्का घलोक इहां मिले हे। छत्तीसगढ़ अऊ गुजरात पहिलीच ले आपस म जुड़े रहे हे। हम श्रेष्ठ भारत कोति आगू बढ़त हन। एखर से आपसी संस्कृति अऊ देश प्रेम बाढ़ही। ये कार्यक्रम के तहत सबो सदस्य मन 30 अगस्त तक छत्तीसगढ़ राज्य अतिथि के तौर म रइहीं। इही कार्यक्रम के तहत सिरपुर के भ्रमण इमन करिन। ऊंखर संग एसडीएम महासमुंद श्री भागवत प्रसाद जायसवाल, जनपद सीईओ शशिकांत कुर्रे अऊ कार्यपालन अभियंता लोकनिर्माण श्री एस.आर.सिन्हा मौजूद रहिन।
हम आप मन ल बता देवन के एक भारत श्रेष्ठ भारत योजना के मुताबिक हर एक साल एक राज्य कोति ले कोनो आन राज्य के चिन्हांकन करे जाथे अऊ ओ राज्य के भाखा, इतिहास, संस्कृति, ज्ञान विज्ञान आदि ल अपना के अऊ वोला पूरा देश के आगू रखे जाथे। एकर से दू अलग-अलग राज्य मन के मनखे मन ल एक-दूसर राज्य के संस्कृति अऊ सभ्यता ल समझे अऊ अपनाए के मौका मिलथे जेन, निश्चित रूप ले पर्यटन क्षेत्र म वृद्धि के संभावना ल बढ़ाथे। जेखर से आत्मनिर्भर भारत के सपना ल बल मिलही।
गुजरात विधानसभा के अध्यक्ष संग विधायक मन ह सिरपुर पर्यटन स्थल देखिन
