समाज कल्याण मंत्री श्रीमती लक्ष्मी राजवाड़े ह मोटिवेशनल सेमिनार अउ करियर वर्कशॉप म संघरिन

सूरजपुर, 03 फरवरी 2024। महिला अउ बाल विकास, समाज कल्याण मंत्री श्रीमती लक्ष्मी राजवाड़े आज सूरजपुर जिला के ऑडिटोरियम म आयोजित मोटिवेशनल सेमिनार अउ करियर वर्कशॉप म सामिल होइन। मंत्री श्रीमती राजवाड़े ह शैक्षणिक उन्मुखीकरण कार्यक्रम अंतर्गत आयोजित ए मोटिवेशनल सेमिनार अउ करियर वर्कशॉप ल संबोधित करत पढ़ईया लईका मन ल निरंतर अभ्यास करे के सलाह दीन। उमन कहिन कि निरंतर अभ्यास ले आप मन दक्षता ल प्राप्त करथव अऊ सफलता ल सुनिश्चित कर सकत हव। एखर संगेच उमन समय-सारणी म पढ़ाई ल जादा ले जादा स्थान देहे के बात कहिन ताकि विद्यार्थी उज्जवल भविष्य कोति अपन कदम बढ़ा सकन।
ए मौका म प्रेमनगर विधायक श्री भूलन सिंह मराबी ह घलोक पढ़ईया लईका मन ल संबोधित करके अपन अनुभव साझा करिन। कार्यक्रम म मोटिवेशनल स्पीकर श्री प्रिंस वर्मा ह शानदार प्रस्तुति दीन। उमन उपस्थित पढ़ईया लईका मन ल जीवन म अवइया चैलेंज के सामना करे बर महत्वपूर्ण टिप्स दीन। उमन लइका मन ल बताइन कि निरंतर प्रयास ले असंभव काम ल घलोक पूरा करे जा सकथे। एखर संगेच उमन लइका मन ल बड़े-बड़े सपना देखे बर प्रेरित करिन अऊ ओला साकार करे बर निरंतर कइसे प्रयास करना हे ओ म घलोक प्रकाश डालीन।